عالمی پدھر اُتے نکے بالاں دے سوشل میڈیا ورتن اُتے پابندی لگن لگ پئی اے۔
اسلام آباد: سوشل میڈیا دے پُٹھے (منفی) اثرات دے خلاف وڈا قدم چکدیاں ہویاں عالمی پدھر اُتے نکے بالاں دے سوشل میڈیا ورتن اُتے پابندی لگن لگ پئی اے۔
تفصیلات دے مطابق بالاں دی اخلاقی تربیت سمیت ذہنی تے جسمانی صحت اُتے ودھدے ہوئے سوشل میڈیا دے پُٹھے اثرات نے پوری دنیا نوں ہلا کے رکھ دتا اے۔
سوشل میڈیا دے بالاں دی ذہنی، جسمانی تے اخلاقی نشوونما اُتے ودھدے ہوئے منفی اثرات نوں دیکھدیاں ہویاں دنیا بھر وچ نکے بالاں دے سوشل میڈیا ورتن اُتے پابندیاں تے سخت قاعدے قانون لاگو کیتے جا رہے نیں۔
عالمی خبر رساں ادارے رائٹرز نے دَسیا کہ آن لائن پلیٹ فارمز نوں قانون دے دائرے وچ لے کے آؤن والے ملکاں دی گنتی وچ تیزی نال اضافہ ہو رہا اے، جدکہ وکھو وکھ حکومتیاں بالاں نوں آن لائن ختریاں توں بچاؤن لئی نویں قانون سازی کر رہیاں نیں۔
اسکائی نیوز دا کہنا سی کہ آسٹریلیا نے 16 سال توں گھٹ عمر دے بالاں دے سوشل میڈیا ورتن اُتے پابندی لا دتی اے تے قانون اُتے عمل نہ کرن والے سوشل میڈیا پلیٹ فارمز نوں 49.5 ملین ڈالر تیکر جرمانے دا ساہمنا کرنا پے سکدا اے۔
رپورٹ دے مطابق چین دے سائبر اسپیس ریگولیٹر نے “مائنر موڈ” پروگرام دے تحت ڈیوائس دی پدھر اُتے پابندیاں تے ایپس لئی خاص قاعدے لاگو کیتے نیں تاں جے بالاں دی آن لائن سرگرمیاں نوں محدود تے محفوظ بنایا جا سکے۔
ایسے طرحاں انڈونیشیا نے تقریباً 7 کروڑ بالاں اُتے سوشل میڈیا دے پین والے اثرات نوں دیکھدیاں ہویاں 16 سال توں گھٹ عمر دے افراد لئی پابندیاں متعارف کرائیاں نیں، جدکہ برازیل نے 16 سال توں گھٹ عمر دے صارفین دے سوشل میڈیا اکاؤنٹس نوں قانونی سرپرست نال جوڑنا لازمی قرار دتا اے۔
ماہرین دا کہنا اے کہ بالاں نوں آن لائن نقصان، غیر مناسب مواد تے دوجے ڈیجیٹل ختریاں توں محفوظ رکھن لئی ایسے قدم ویلے دی اہم لوڑ نیں۔
