کراچی وچ ڈاکٹر آکاش دی کار اُتے فائرنگ دی ویڈیو سامنے آ گئی

کراچی دے علاقے کلفٹن تن تلوار دے نیڑے ڈاکٹر آکاش دی کار اُتے فائرنگ دی ویڈیو منظرعام تے آ گئی اے۔

اے آر وائی نیوز نوں لبھن والی ویڈیو وچ دیکھیا جا سکدا اے کہ اک ملزم بھجدا ہویا آیا، اوہنے پہلے گارڈ تے فائرنگ کیتی، فیر ملزم نے کار دا بوہا کھولیا تے پیسیاں نال بھریا بیگ چُک لیا۔ ملزم نے جلدی وچ اک بیگ چُکیا جد کہ دوجا بیگ مقتول دے ہتھ وچ سی، ڈاکو نے ڈاکٹر آکاش تے فائرنگ کیتی تے ایسے دوران اوتھے بھج دَڑ مچ گئی۔

بعد وچ مقتول ڈاکٹر آکاش دے چچا کھیم چند نے دسیا کہ فائرنگ ویلے اوہناں دے نال والد تے کزن وی موجود سن۔ بینک دے باہر سرعام فائرنگ کر کے میرے معصوم بھتیجے نوں قتل کیتا گیا اے، ساڈا تعلق کاروباری خاندان نال اے تے اسیں ملک دے منے پرمنے صنعتکار آں۔

اوہناں نے آکھیا کہ سیکیورٹی دی خراب صورتحال وچ ساڈے بچیاں نوں قتل کیتا جا رہیا اے، وزیر اعلیٰ مراد علی شاہ تے اعلیٰ حکام ایہناں واقعیاں دا فوری نوٹس لین۔ مقتول دے چچا نے آکھیا کہ جے انج سڑکاں تے لائق لوکاں نوں ماریا جائے گا تے فیر کون ایتھے رہنا پسند کرے گا۔

اوہناں نے دسیا کہ ڈاکٹر آکاش جناح ہسپتال وچ 2 سال توں ڈیوٹی کر رہے سن، اوہناں دی عمر 28 سال سی تے اوہ اجے کنوارے سن۔