کراچی: ڈائریکٹر جنرل کالجز تے ڈائریکٹر پرائیویٹ اسکولز دے دفتراں وچ 10 دناں توں بجلی غائب
کراچی: ڈائریکٹر جنرل کالجز تے ڈائریکٹر پرائیویٹ اسکول دے دفتراں وچ بدترین لوڈشیڈنگ جاری اے، واجبات تارن دے باوجود پچھلے 10 دناں توں بجلی دی سپلائی بند اے۔
تفصیلات دے مطابق ڈائریکٹر جنرل کالجز سندھ تے ڈائریکٹر پرائیویٹ اسکولز دے دفتراں وچ پچھلے 10 دناں توں بجلی دی فراہمی معطل ہون پاروں روز مرہ دے سرکاری کم کار شدید متاثر ہو رہے نیں۔
محکمہ کالجز دے افسراں نے دسیا کہ سارے واجبات تارن دے باوجود کے الیکٹرک نے دفتراں دی بجلی کٹی ہوئی اے، جیہدی وجہ توں پورے سندھ دے سرکاری کالجاں نال رابطے تے دوجے دفتری کم رُکے ہوئے نیں۔
افسراں دا کہنا اے کہ اس معاملے تے کے الیکٹرک نوں کئی واری دَسیا جا چکیا اے تے باقاعدہ چٹھی وی گھلی گئی اے، پر اجے تیکر بجلی بحال نہیں کیتی گئی۔
محکمہ کالجز دے مطابق سارے بقایا جات پہلے ای تارے جا چکے نیں تے مسئلے دے حل لئی پی ایم ٹی (ٹرانسفارمر) بدلن دی بھی عرضی دتی گئی اے، پر اس تے کوئی پیش رفت نہیں ہوئی۔ افسراں نے الزام لایا کہ کے الیکٹرک بنا کسے وجہ توں پیسے نہ تارن دا بہانہ بنا کے بجلی دی فراہمی روکدی اے، جیہدے نال ہنگامی انتظامی تے تعلیمی امور متاثر ہو رہے نیں۔
