آرمی چیف دا ترکیہ دا سرکاری دورہ، صدر تے عسکری قیادت نال اہم ملاقاتاں
راولپنڈی (14 جولائی 2026): آرمی چیف تے چیف آف ڈیفنس فورسز فیلڈ مارشل عاصم منیر نے ترکیہ دے سرکاری دورے دے دوران صدر تے عسکری قیادت نال اعلیٰ پدھر دیاں ملاقاتاں کیتیاں۔
مسلح افواج دے ترجمان ادارے دے مطابق فیلڈ مارشل عاصم منیر نے ترکیہ دے صدر رجب طیب اردوان تے وزیرِ قومی دفاع یاشار گولر نال ملاقات کیتی، تے آپسی (باہمی) دلچسپی دے معاملیاں تے علاقائی سلامتی تے گل بات کیتی۔ اعلیٰ پدھر دی گل بات وچ خطے وچ تیزی نال بدلدی صورتحال تے غور کرن سمیت مضبوط اسٹریٹجک بھائی چارے نوں ودھان دے سانجھے وژن تے زور دتا گیا۔
آئی ایس پی آر دے مطابق ایس توں پہلاں، ترک جنرل اسٹاف ہیڈ کوارٹرز وچ فیلڈ مارشل نوں گارڈ آف آنر پیش کیتا گیا، اوہناں نے ترک جنرل اسٹاف دے سربراہ جنرل سلچوک بائراکتاروغلو نال تفصیلی ملاقات کیتی تے علاقائی سلامتی دی صورتحال تے آپسی دلچسپی دے پیشہ ورانہ معاملیاں تے گل بات کیتی۔
اک پروقار تقریب وچ سی ڈی ایف دیاں نمایاں خزمتاں تے دوطرفہ عسکری تعاون نوں ودھان دیاں کوششاں دے اعتراف وچ، جنرل سلچوک بائراکتاروغلو نے فیلڈ مارشل نوں ترک مسلح افواج دے ‘امتیازی خدمات دے ایوارڈ’ نال نوازیا۔
سپہ سالار نے ترک بری فوج دے ہیڈ کوارٹرز دا وی دورہ کیتا، جتھے ترک بری فوج دے کمانڈر جنرل میٹن ٹوکل نے اوہناں دا استقبال کیتا۔ فیلڈ مارشل نے مصطفیٰ کمال اتاترک دے مزار ‘انیت کبیر’ دا دورہ کیتا، جتھے اوہناں نے پھول رکھے تے نویں ترکی دے بانی نوں خراجِ تحسین پیش کیتا۔
فیلڈ مارشل دا ایہ دورہ دوہاں قوماں دے ایس عزم دی عکاسی کردا اے کہ اوہ اپنے کثیر جہتی دفاعی تعلقات نوں ہور مضبوط کرن تے علاقائی امن تے استحکام لئی اپنیاں سانجھیاں کوششاں جاری رکھن۔
