امریکہ نے ایرانی انفرااسٹرکچر تے حملہ کیتا تے پورے خطے دا انفرااسٹرکچر تباہ کر دیاں گے: ترجمان خاتم الانبیاء ہیڈکوارٹر
ایرانی فوج دے خاتم الانبیاء مرکزی ہیڈکوارٹر دے ترجمان نے امریکہ نوں سخت وارننگ دیندے ہوئے آکھیا اے کہ جے ایران دے انفراسٹرکچر نوں نشانہ بنایا گیا تے خطے وچ جیہڑا وی انفراسٹرکچر باقی اے اوہنوں تباہ کر دتا جائے گا۔
ایرانی خبر رساں ادارے “ارنا” دے مطابق ابراہیم ذوالفقاری نے آکھیا کہ امریکہ خطے وچ اپنی قانون شکنی تے عدم استحکام نوں جاری رکھے ہوئے اے، آبنائے ہرمز ایران لئی سرخ لکیر اے، امریکہ نوں ایس معاملے وچ مداخلت نہیں کرن دیاں گے۔
اوہناں نے مزید آکھیا کہ جے امریکی صدر دی حالیہ دھمکیاں تے عمل کیتا گیا تے ایران دے انفراسٹرکچر نوں نشانہ بنایا گیا، تے ایران دے ضبط تے تحمل پاروں خطے دا جیہڑا انفراسٹرکچر ہُن تیکر محفوظ رہیا اے اوہنوں آہنی وار نال اینج کچل دتا جائے گا کہ اوہدا کوئی نشان وی باقی نہیں رہے گا۔
ترجمان دا مزید کہنا سی کہ دشمن ایہ جان لوے کہ ساڈے لئی فیصلہ کن کاروائی دا لمحہ ضبط دا نہیں ہوندا۔ ایران دی مسلح افواج ولوں جیہڑا ردعمل آئے گا اوہ برابری دا نہیں بلکہ اوہدے توں کتے زیادہ ہوئے گا، ایہ حملے پہلے توں زیادہ شدید، زیادہ وسیع تے زیادہ تباہ کن ہون گے۔
