شدید گرمی وچ رات نوں اے سی ورتن نال نیند کیوں متاثر ہوندی اے؟
اے سی (AC) چلا کے سون دے باوجود نیند کیوں خراب ہوندی اے؟ طبی ماہرین دے انکشافات
بہتے لوک ایئر کنڈیشنر (اے سی) نوں گرمیاں دی قاتل گرمی توں بچن دا اکو اک ہتھکنڈہ سمجھدے نے۔ پر بھارتی میڈیا دی اک رپورٹ وچ دسیا گیا اے کہ ایس سال ڈاکٹروں ولوں اے سی والے کمریاں وچ سون دے باوجود نیند خراب ہون دیاں شکایتاں وچ وادھا ویکھیا گیا اے۔ لوک رات نوں بار بار جاگن، پسینہ آؤن، سویرے سر پیڑ تے دن بھر تھکاوٹ ورگے مسئلیاں دا سامنا کر رہے نے۔
ہیٹ ویو تے نیند دا قدرتی نظام
لو (Heat Waves) دی شدت نے نیند دے قدرتی نظام نوں بری طرحاں ہلا کے رکھ دتا اے۔ طبی ماہرین دے مطابق دن ویلے تپدی گرمی وچ رہن تے رات نوں غیر معمولی حد تیکر گرمی ہون پاروں، جسم دی اوہ صلاحیت متاثر ہوندی اے جیہڑی نیند دے دوران پنڈے دا درجہ حرارت کنٹرول کردی اے۔ ایہو وجہ اے کہ اے سی وی گرمی دے اثرات نوں پوری طرحاں ختم نہیں کر پاؤندا، خاص طور تے اوہناں کمریاں وچ جیہڑے بہت زیادہ ٹھنڈے ہون یا جپھے ہوا دی نکاسی (Ventilation) دا نظام ماڑا ہووے۔
وڈے خطرے دی گھنٹی: ڈاکٹروں نے خبردار کیتا اے کہ دمہ (Asthma)، سلیپ اپنیا (سون ویلے ساہ رکنا)، ساہ دی نالی دی الرجی، دل دے مریضاں تے ڈی ہائیڈریشن (پانی دی گھٹتا) دا شکار بندیاں لئی اے اثرات زیادہ خطرناک ہو سکدے نے۔
طبی ماہرین دی رائے
فورٹس اسکارٹس ہارٹ انسٹی ٹیوٹ دے پھیپھڑیاں دے ماہر ڈاکٹر ایوی کمار دا کہنا اے کہ حالیہ ہفتیاں وچ ایسے کئی مریض آئے نے جیہڑے اے سی ورتن دے باوجود ماڑی نیند دا گلہ کر رہے نے۔
اوہناں دسیا:
“جوں پنڈے دا درجہ حرارت تھوڑا جیا گھٹدا اے، تاں ای گہری نیند آؤندی اے۔ پر تپدے موسم تے گرم راتاں پاروں جسم لئی اپنا درجہ حرارت گھٹ کرنا بڑا اوکھا ہو جاندا اے۔”
سائینسی تحقیق کیہ کہندی اے؟
‘یو ایس نیشنل لائبریری آف میڈیسن’ وچ چھپن والی اک تحقیق دے مطابق، ساڈے آلے دوالے دا درجہ حرارت نیند لئی بہت اہم اے۔ زیادہ گرمی وچ رہن نال اکھ بار بار کھلدی اے تے گہری نیند (Deep Sleep) دا ویلا گھٹ ہو جاندا اے۔ اک ہور نویں تحقیق وچ دسیا گیا اے کہ رات نوں گرمی ودھن نال سون ویلے جسم دا درجہ حرارت وی ودھ جاندا اے، جیہدے نال نیند دا بیڑا غرق ہو جاندا اے۔
مریضاں دیاں عام شکایتاں:
ڈاکٹراں دے مطابق، مریض اکثر ایہناں مسئلیاں دی شکایت کردے نے:
رات نوں اچانک اکھ کھل جانا تے بہت زیادہ پسینہ آؤنا۔
سویرے اٹھدیاں ہی سر وچ پیڑ ہونا۔
سارا دن تھکاوٹ، چڑچڑاپن تے کسے کم وچ دھیان نہ لگنا۔
اے سی دی خشک ہوا پاروں گلا سکن نال ساہ دا نظام متاثر ہونا۔
اے سی دا درجہ حرارت بہت گھٹ رکھن دے نقصان
بہتے لوک دن بھر باہر سڑن بھجن توں بعد گھر آ کے اے سی نوں فل ٹھنڈا (جیویں 16 یا 18 ڈگری تے) کر دیندے نے۔ پر درجہ حرارت وچ ایہ اچانک وڈی تبدیلی نیند تے پٹھا اثر پاؤندی اے۔
ماہرین دا کہنا اے کہ کمرے دا نارمل ٹھنڈا ہونا تے نیند لئی چنگا اے، پر بہت زیادہ ٹھنڈ یا درجہ حرارت دا اچانک بدلنا جسمانی نظام نوں خراب کر دیندا اے، جیہدے نال بندہ رات بھر سکون دی نیند لئی ترسدا رہندا اے۔
