سائنسداناں نے پہلی وار مصنوعی انڈے توں چوزے دی پیدائش وچ کامیابی حاصل کر لئی

سائنسداناں نے پہلی وار مرغی دے چوزے نوں مصنوعی انڈے راہیں دنیا وچ لیان وچ کامیابی حاصل کیتی اے۔

ایس وڈی کامیابی نال ماضی وچ مک (معدوم ہو) جانے والے 12 فٹ لمے پرندے ‘موآ’ (moa) نوں فیر توں واپس لیان وچ مدد مل سکے گی۔

‘کولوسل بائیوسائنسز’ (Colossal Biosciences) ناں دی کمپنی نے دسیا کہ اک کیپسول دے اندر زندہ چوزیاں دے بنن دے عمل نوں پورا کیتا گیا۔ ایس کیپسول یا مصنوعی انڈے دے اتے شیشہ لگا ہویا سی جس توں سائنسدان اندر موجود چوزیاں دی نشوونما نوں کئی ہفتیاں تیکر مانیٹر کردے رہے۔

ایس امریکی کمپنی دی مینیجر ‘پیج میک نکل’ (Paige McNickle) نے دسیا کہ ”جدوں مصنوعی انڈے توں چوزے نوں باہر کڈیا گیا، تاں اوہ بہت حیران کن تجربہ سی۔“

ایس ٹیکنالوجی نوں بنیادی طور اُتے نیوزی لینڈ دے ساؤتھ آئی لینڈ وچ ماضی وچ رہن والے ‘موآ’ پرندیاں نوں فیر توں زندگی دین لئی ڈیزائن کیتا گیا اے۔ اوہناں پرندیاں دی نسل 1380 تے 1445 دے درمیان دنیا توں مک گئی سی۔

اوہناں پرندیاں دے انڈے مرغی دے اک انڈے دے مقابلے وچ 80 گنا زیادہ وڈے ہوندے سن۔ مصنوعی انڈے دی ٹیکنالوجی پاروں اوہناں پرندیاں دے بہت وڈے جثے (حجم) دے بچیاں دی نشوونما ممکن ہو سکے گی۔

کمپنی دے سانجھے بانی ‘بین لام’ نے دسیا کہ ایس طرح دے مک گئے جانداراں نوں فیر توں زندگی دین لئی صرف پرانا جینوم تے ہور خلیاتی عمل ہی ضروری نہیں، بلکہ ایسے سسٹم دی لوڑ وی اے جس وچ اوہناں دی نشوونما ہو سکے۔

انڈے دیکھن وچ سادھے لگدے نیں پر اوہ اندروں بہت زیادہ پیچیدہ ہوندے نیں تے پرندیاں دے جِنین (Embryo) دی نشوونما نوں تحفظ دیندے نیں۔ انڈیاں دے چھلکے وچ ہزاراں بہت ننھے سوراخ ہوندے نیں جنہاں توں آکیسجن آرپار ہوندے اے جدکہ کاربن ڈائی آکسائیڈ تے نمی باہر نکلدی اے۔

ماضی وچ وی مصنوعی انڈیاں دی تیاری دی کوشش کیتی گئی سی پر آکسیجن دی فراہمی وچ سائنسداناں نوں مشکلاں دا سامنا ہورہا سی، پر ایس نویں ٹیکنالوجی وچ ایس مسئلے اُتے قابو پا لیا گیا اے۔