پاکستان دا ناں روشن 8 سالاں دے پاکستانی نژاد بچے نے ناسا دی غلطی پھڑ لئی، خلائی ادارے نے آکھیا شکریہ

8 سالاں دے پاکستانی نژاد بچے نے ناسا دی ویب سائٹ تے غلطی پھڑ لئی، خلائی ادارے نے کھلے دل نال شکریہ آکھ کے دلاں نوں جت لیا

8 سالاں دے پاکستانی نژاد بچے نے ناسا دی ویب سائٹ تے موجود غلطی ول دھیان دوا کے سب نوں حیران کر دتا اے، جدکہ خلائی ادارے نے وی کھلے دل نال اپنی غلطی نوں من لیا اے۔ اک نکے جئے بچے ولوں ناسا دی سرکاری ویب سائٹ تے نکی جئی غلطی پھڑے جان توں بعد اے دلچسپ واقعہ سوشل میڈیا تے بڑی تیزی نال وائرل ہو گیا اے۔

بچے دے والد مسرت علی نے ‘ایکس’ (پرانا ٹوئٹر) تے ہسدے ہساندے ناسا نوں ایس غلطی بارے دَسیا تے ایہنوں ’اہم مشن اپڈیٹ‘ آکھیا۔ ناسا نے وی بڑے سوہنے طریقے نال جواب دیندیاں ہویاں بچے دی ایس گل دی تعریف کیتی، جیہڑی لوکاں نوں بہت پسند آئی۔ تفصیلاں دے مطابق ناسا دی اک پوسٹ وچ ’Explore Jupiter‘ دی جگہ غلطی نال ’Expor Jupiter‘ لکھیا گیا سی، یعنی لفظ ‘Explore’ وچوں ’l‘ دا اکھر غائب سی۔

بچے دے پیو نے اپنی پوسٹ وچ لکھیا کہ اوہناں دے 8 سالاں دے پتر نے اے غلطی ویکھی سی تے اصرار کیتا سی کہ ایہنوں ضرور رپورٹ کیتا جائے، جیدے تے ناسا نے جواب دتا کہ “دسن لئی شکریہ، اسیں فوراً ایس غائب اکھر نوں ٹھیک کر رہے آں۔” والد دے مطابق ناسا دے ایس پیار بھرے جواب نال اوہناں دا پتر بہت خوش ہووے گا کیونکہ اوہ خلا، راکٹس تے لانچنگ وچ بہت دلچسپی رکھدا اے تے وڈا ہو کے خلا باز (Astronaut) بنن دے خواب ویکھدا اے۔ اوہناں ہور آکھیا کہ اوہناں دا پتر ایس واقعے نوں اپنی کلاس وچ بڑے فخر نال دسے گا۔

اے دلچسپ گل بات ویکھدیاں ہی ویکھدیاں انٹرنیٹ تے کھنڈ گئی تے لوکاں نے بچے دی تیکھی نظر دی تعریف کیتی تے اوہدے چنگے مستقبل لئی دعاواں دتیاں۔ اک بندے نے لکھیا کہ “اے بچہ واقعی ہیرو اے تے ایہنوں اگلی وار مشناں وچ شامل کرنا چاہیدا اے” جدکہ اک دوجے بندے نے آکھیا کہ “اج اوہ اک نکی جئی غلطی ٹھیک کر رہا اے، کل نوں شاید مریخ (Mars) تے وڈیاں ذمہ داریاں سانبھر ہیا ہووے گا۔”