طیارے دے ٹیک آف یا لینڈنگ دے دوران فوڈ ٹرے نوں کیوں بند رکھیا جاندا اے؟
ہوائی سفر بوہتے (بیشتر) لوکاں لئی بڑا ہی چا چاڑھن والا (پرجوش کر دینے والا) ہوندا اے۔
ہن ایہ فضا وچ اڈن دا تجربہ ہووے، 30 ہزار فٹ دی اچائی (بلندی) توں باہر دا نظارہ یا کسے نویں تھاں (چیز) دا خیال، ایہ کسے ایڈونچر ورگا لگدا اے۔
جس ویلے تسیں کسے جہاز تے سوار ہوندے او تے اک خاص پروٹوکول تے عمل کرن دے پابند ہوندے او۔ جیویں سیٹ بیلٹ بنھنا، ڈیوائسز نوں ایروپلین موڈ تے لانا تے عملے دیاں بچاؤ (حفاظتی) ہدایتاں نوں سننا۔
ویسے تے پروٹوکول ہمیشہ اکو جیہا ہی رہندا اے پر کی تسیں کدی سوچیا کہ آخر طیارے دے ٹیک آف یا لینڈ کرن دے ویلے فوڈ ٹرے نوں بند کرن دی ہدایت کیوں کیتی جاندی اے؟ بظاہر تے ایہ نکی جہی چیز نظر آؤندی اے پر جہاز دا عملہ ایس تے سختی نال عمل کرواندا اے۔
تہانوں ایہ جان کے حیرت ہووے گی کہ فوڈ ٹرے نوں بند کروان دا کم ہوائی سفر وچ بچاؤ (تحفظ) دے حوالے توں بڑا ضروری ہوندا اے۔ ایہدی وڈی وجہ ایمرجنسی دے دوران مسافروں دے بچاؤ نوں پکا (یقینی) بنانا اے۔
ماہرین دے مطابق فیڈرل ایوی ایشن ایڈمنسٹریشن ولوں منگ کیتی جاندی اے کہ ایمرجنسی حالات وچ 90 سیکنڈ دے اندر مسافروں نوں باہر کڈھنا ممکن ہووے۔ عام طور تے جہازاں دے نیرے تیرے (لگ بھگ) 50 فیصد حادثے ٹیک آف تے لینڈنگ دے دوران ہوندے نیں، تاں ہر سیکنڈ دی اہمیت ہوندی اے تے ہر کھلی ہوئی ٹرے اک رکاوٹ بن سکدی اے۔
اوہناں نے دَسیا کہ ایہ بوہتا ویلا نہیں ہوندا تے عام طور تے ایس بارے مسافروں نال گل نہیں کیتی جاندی، پر جدوں کسے جہاز وچ ایمرجنسی حالات ہون تے فوڈ ٹرے کھلی ہووے تے تسیں جہاز توں 90 سیکنڈ دے اندر باہر نہیں نکل سکدے یا تہاڈے پچھے موجود لوک 90 سیکنڈ تیکر اپنی تھاں توں ہل نہیں سکدے۔
ایس اصول دا لاگو (اطلاق) دنیا بھر وچ ایوی ایشن انتظامیہ ولوں کیتا جاندا اے تے ٹیک آف یا لینڈنگ دے دوران رکاوٹاں نوں صاف (کلیئر) رکھیا جاندا اے تاکہ مسافر چھیتی (جلدی) باہر نکل سکن۔
