سستا تیل، گیس تے سفارتی فائدے: ایران، امریکہ معاہدے دا ’مرکزی ثالث‘ پاکستان ایس تنازعے دے حل نال کیہ فائدے حاصل کر سکدا اے؟
امریکہ تے ایران دے وچکار معاہدے دے اعلان دا جتھے عالمی سطح اُتے خیرمقدم کیتا جا ریا اے، اُتھے ایہناں دواں ملکاں دے وچکار ثالث دا کردار ادا کرن والے پاکستان دی وی اک وار فیر تعریف کیتی جا رہی اے۔
پاکستان دے وزیرِاعظم شہباز شریف دا کہنا اے کہ 19 جون نوں سوئٹزرلینڈ وچ امن معاہدے اُتے دستخطاں دی تقریب دی میزبانی وی پاکستان ہی کرے گا۔
شہباز شریف ولوں امن معاہدہ طے ہو جان دے بیان توں بعد برطانیہ، چین، آسٹریلیا، ترکی، قطر، سعودی عرب، کینیڈا، اٹلی، نیدرلینڈز، ملائیشیا تے کویت دے وزرائے اعظم تے صدراں نے پاکستان دا ناں لے کے ثالثی دیاں کوششاں وچ سرگرم ہور ملکاں دا وی شکریہ ادا کیتا۔
اقوامِ متحدہ دے سیکریٹری جنرل ولوں جاری بیان وچ وی پاکستان دے کردار دی تعریف کیتی گئی۔
واضح رہے کہ اتوار تے پیر دی درمیانی رات پاکستان دے وزیرِاعظم نے امریکہ تے ایران دے وچکار معاہدہ طے ہو جان دا اعلان کیتا سی۔
