نبیﷺ دی یاد

شفیق قریشی

بنے اُتے ٹونے ہارے رکھ دے وانگوں
سُک سڑ جاندے
کنڈھیاں اُتے کاغذ دی بیڑی دے وانگوں
کھر کھر جاندے
دشمن نال تے لیکھا کاہدا
سجناں ای ہتھوں
مر مُک جاندے
پانی پانی کردی ہوئی
چھل کسے تریہائی وانگوں
تسے رہندے
جھوٹھیاں دے گل ہار تے
ساڈے ورگیاں دے گل
رسے رہندے
مہنیاں دی کسے گڈ دے تھلے
مدھے جاندے
جنتاں دا کوئی راہ نہ سجھدا
دوزخ ولّے
سدھے جاندے
ساڈی کوئی منیاد نہ ہوندی
ساڈے کھیسے دے وچ جیکر
تیری نگھی یاد نہ ہوندی