نعت شریف

علی احمد گجراتی

مِرے آقاۖ کوئی کِسراں کرے رتبہ رقم تیرا
بلندی توں بلند تر ہے جدوں پہلا قدم تیرا
تیرے اوصافِ کامل تے سمجھ میری توں بالا نیں
ثنا خوانی کراں تیری ہے ایہ سارا کرم تیرا
علی لجپال دے بچیاں بڑا سوہنا بچایا اے
تیری محنت تیری حُرمت حشم تیرا بھَرم تیرا
مزملۖ وی مدثرۖ وی تسیں یٰسینۖ تے طٰہٰۖ
تسیں چہرہ خدا دا او لقب شاہِ اممۖ تیرا
اطاعت آپۖ دی کیتی خدا واجب جہاناں تے
زمیں نوکر زماں نوکر سخی باغِ اِرم تیرا
تیرے دَر تے فرشتے وی ادب دے نال جُھکدے نیں
زمانے تے ودھا رکھیا خدا جاہ حشم تیرا
محمدۖ دی ثناء اندر ہمیشہ ہی علی احمد
عقیدت نال ورقے تے رہوے ٹُردا قلم تیرا