حسین ابن حیدر ؑ

عقیل شافی

حسین ابن حیدر دے پیارے بہتر
گئے دین آقا توں وارے بہتر
انوکھا ای تکیا فلک نے ایہہ منظر
یزیدی ہزاراں، ایہہ سارے بہتر
امر کر گئے نیں اصولاں نوں جگ تے
حبیب خدا دے دُلارے بہتر
اوہ اپنے مثالی نیں آپے ای سارے
جو مولا نے اک اک اُتارے بہتر
فنا ہو نہ جاندا اوہ لشکر یزیدی
جے انگلی تھیں کردے اشارے بہتر
جدوں تک رہوے گی سمے دی روانی
رہون گے چمک دے ستارے بہتر
سلام اوہدی عظمت تے بھیجسن دو عالم
جنہے امتحاں چوں گزارے بہتر
جدوں تیر حرمل دا اصغر نوں وجا
تڑپ اُٹھے سن وانگ پارے بہتر
سلام اوس زینب دی جرأت نوں شافی
شہید آپ جیس نے شمارے بہتر