نعت شریف

علی احمد گجراتی

آئو رل مل گلاں کرئیے مدنی دے رُخسار دیاں
ذِکر الاپیے نعتاں پڑھیئے نبیاں دے سردار دِیاں
محفل محفل چانن وَنڈدا جِس دا ناں ایں ازلاں توں
شان سوایا رب نیں کیتا سوچ سمجھوتے عقلاں توں
آپ خدا وی قسماں کھاندا سوہنے اِس شہکار دِیاں
آئو رل مل گلاں کریئے مدنی دے رُخسار دِیاں
کوئی قُمری صفتاں کردے بلبل گیت سنائوندے نیں
جگنو تتلی موجاں کردے پُھل کلیاں مسکائوندے نیں
جگ دی رَگ رَگ مہکاں رَچیاں طیبہ دے گلزار دیاں
آئو رل مل گلاں کرئیے مدنی دے رُخسار دِیاں
جو کجھ ہویا جو کجھ ہونا آقاۖ سبھ کجھ جاندے نیں
دھرتی تھلے امبراں اُتے جانوں کل مکان دے نیں
میرے آقاۖ خبراں رکھدے عرشاں توں وی پار دِیاں
آئو رل مل گلاں کرئیے مدنی دے رُخسار دِیاں
صدقے جائیے اُس توں جِسدے ناں توں سینے ٹھردے نیں
دویں عالم ہَس ہَس اپنے دل پئے قدمیں دَھردے نیں
ہر تھاں اندر لشکاں احمد چانن دے مینار دِیاں
آئو رل مل گلاں کرئیے مدنی دے رُخسار دِیاں