نعت شریف
پیر فقیر ویر سپاہی
خاص تہوار آیا، سوہنا نیکوکار کوئی
سچا کردار آ گیا
ازلی سی نور جیہڑا، ہو گیا ظہورِ اوہدا
مشعل بردار آ گیا
جشن منائو آئو، لڈیاں، دھمالاں پائو
سچا سچیار آ گیا
لکھت انمول لے کے، اچا لکھیار جویں
کوئی شاہکار آ گیا
قلیہ قانون نہیں سی
قہریں ڈبی قوم تائیں
شعور شعار آ گیا
ہوئیاں بے چین روحاں
ربوں منظوری ہوئی
دلاں نوں قرار آ گیا
پتر عبداللہ جو، چن اوہ قریش دا سی
بن سردار آ گیا
مولا دا معشوق سچا، پورم انسان اچا
ربی دلدار آ گیا
لکھیے کوئی لیکھ ایہا، لیکھ جو سنوار دیوے
لیکھاں دا مختار آ گیا
اک واری ویکھیاں نہ، لتھے ریجھ مُڑ مُڑ
ویکھن اصرار آ گیا
اکھ توں نہ جھلی جاوے، جھلمل مُکھڑے دی
اوڑھ جھلکار آ گیا
ماڑا جیہا عشق میرا، بلوان سورمے دا
حسن ہشیار آ گیا
واٹ نھیری پندھ لمے، کرن واہتے رہنمائی
روشن مینار آ گیا
جھوٹھڑے فریبیاں تے، رب دیاں دشمناں دا
کرن انکار آ گیا
بھُلیاں نوں پان راہے، بتی کڈھن ماڑیاں دی
کٹن ونگار آ گیا
دکھاں وچ بوہڑ پیا، جگدیاں پاپیاں چ
نیک اطوار آ گیا
ہسدا روانہ ہویا، جیہڑا اوہدے در اُتے
روندا زاروزار آ گیا
سوچ اچ پدھراں دی، موئیمکے مھاتڑاں چ
جین دا معیار آ گیا
پال کے پیار سینے، سجرا کوئی عشقِ لے کے
پریم دا اوتار آ گیا
ہجراں چ رون اکھیں، وگن جھلاراں جیویں
نیناں چ خمار آ گیا
فوٹو کھچے نور دیاں، ہووے نوری کیمرہ جے
لے کے لشکار آ گیا
حاضر اوہو ناظر اوہو، پہن کے فضیلتاں دی
سوہنی دستار آ گیا
عرب چوں ہوا چلی، کرماں والا پیر آیا
سانوں عتبار آ گیا
اوہلا ناہیں رب کیتا، عشق گجھے بھیتاں والی
ڈھان لئی دیوار آ گیا
خیراں تیرے عشق دیاں، جتھے پیر خیر ہووے
خیریں اخیار آ گیا
سوچاں تے تخیلاں نوں، ملی پرواز اچی
فکر افکار آ گیا
توبہ توبہ بھلی ہوئی سی، دنیا دے حال مندے
جگ تے سدھار آ گیا
لے کے قرآن آیا، راز ڈونگھے قدرتاں دے
کھولن اسرار آ گیا
وصلاں دی بھُکھ لگی، تپے بلے دل جیہا
ماہی منٹھار آ گیا
لگدا اے رب آپے، میم دا لباس پہن
دیون دیدار آ گیا
رب دیاں دشمناں نوں بتاں دے پجاریاں نوں
کرن مسمار آ گیا
جنتی پوشاک پا کے، چڑھ کے براک اتے
عرشِ دا زوار آ گیا
کفر دے منار ڈھٹھے، بدھو خرکار ڈھٹھے
علم بردار آ گیا
تیرے ناں دے اکھراں دے، سبھو جنتی میویاں تے
ثمر اثمار آ گیا
کوڑیاں دی کھیڈ مکی، حق سچ کھیڈاں وال
اوڈا کھڈکار آ گیا
جاگ پین لیکھ موئے، ستیاں قسمتاں نوں
کرن بیدار آ گیا
پاونی شفا سبھاں اسم اچا روگیاں لئی
جنتوں انار آ گیا
دید والی بھُکھ مندی، نہار پیٹ ہجراں چ
مینوں وی ڈکار آ گیا
پاک ناوں محمد اے، ازلی تعریف والا
اعلیٰ گفتار آ گیا
سبھو اوہدے کمی کاری، آگو نبی ولیاں دا
قافلہ سالار آ گیا
ودھ چن سورجاں توں، نورو نور مُکھڑے تے
پہن لشکار آ گیا
کن کیہا رب سوہنے، جہڑے محبوب واہتے
دلی دلدار آ گیا
پھب بیٹھا ویر ویکھو، نکل گئیاں گنجھلاں نیں
سچے دربار آ گیا
شوم کوڑے لوبھیاں دے، بند ہوئے کارخانے
کھرا کم کار آ گیا
پوجا پاپی پتھراں دی، بتاں دی غلامی مُکی
راہ تے سنسار آ گیا
ویر سپاہی لکھے، نعتاں کیہہ حضور دیاں
پیر جی دار آگیا
