شان حضرت عثمان غنی ذوالنورین
غنی تے صابر ذوالنورین نے کیتا جمع قرآن
ہر اک آیت سوہنے رب دی کیتی جس پروان
حسب قنسب ھے ماں پیو ولوں عبدمناف پڑدادا
پنجویں پشتوں سوہنے نبی نال رشتے وچ مل جان
اوہدے یار صدیق نے دتّا جد اسلام دا سنہیا
اوسے ویلے کلمہ پڑھ کے لے آندا ایمان
کیتی نبی دے نال موودت نالے آل دے نال
ابوبکر تے عمر خلیفہ تیجے یار عثمان
جس دے عقد چ نبی نے بیٹی دوجی وی دے دتی
اوہدیاں شاناں بارے دسو کہڑا کرے گمان
سوہنے آکھیا مسلماناں لئی جووی کھوہ لے دیوے
سمجھو حوضِ کوثر اُس نے کر دتا اے دان
اگے ہوکے ابن عفان نے بھر لئی حامی سچی
بھاری قیمت دے کے پورا کر دتا فرمان
کئی ہزاراں اُٹھ جہناں نے نال سامان دے بھر کے
سوہنے نبی دے آکھن اُتے کر دتے قربان
عثمان غنی دے گھر تے پہرہ رکھنا حسن حسین
فرمایا سی پتراں تائیں حیدر شیر جوان
عثمان غنی نے اک دعوت وچ نبی دے ہر قدم تے
کیتے کئی غلام آزاد اپڑن تک مکان
عثمان غنی دی شان دا منکر مریا جس ویلے
نبی جنازہ نہیں پڑھایا روک دتا فیضان
اپنی زندگی ساری جس نے پاک مُطہر گزاری
وچ امیرت ماڑیاں دی وی کیتی اوس پچھان
غیب دان نبی نے دسیا ہوسی یار شہید
نہیں گھبرائونا صبر وی کرنا پڑھنا پاک قرآن
مال تے زر دا ڈھیر چا لایا جس نے سوہنے اگے
دس نظامی اوہدی شان میں کسراں کراں بیان
