اپنی جان وار کے خودکش بمبار نوں روکن والے بہادر شہری نوں ستارہ شجاعت دین دی منظوری۔
اسلام آباد: حکومتِ پاکستان نے کوہاٹ وچ خودکش بمبار نوں روک کے قیمتی جاناں بچان والے شہری لیاقت نوں ستارہ شجاعت دین دی منظوری دے دتی اے۔
کجھ دن پہلاں کوہاٹ دے نیڑے اک مشتبہ خارجی دہشت گرد کھیتاں دے رستے اگے ودھ رہا سی، اٹک دی تحصیل جنڈ دے پنڈ منکور دے رہائشی لیاقت نے اوس مشتبہ بندے نوں روک کے اوہدی شناخت پچھی، شناخت پچھن اُتے خودکش حملہ آور نے بوکھلاہٹ وچ اپنے آپ نوں دھماکے نال اڑا دتا۔
خودکش دہشت گرد نوں روک کے قیمتی جاناں بچان والے لیاقت شہید دی قربانی دا قومی سطح اُتے اعتراف کیتا گیا۔ وزیراعظم شہباز شریف نے اپنی جان قربان کر کے مقامی آبادی نوں وڈی تباہی توں بچان والے شہری لیاقت نوں “قوم دا ہیرو” قرار دتا۔ وزیراعظم دی سفارش اُتے صدرِ مملکت نے لیاقت شہید لئی ستارہ شجاعت دی منظوری وی دے دتی اے، تے لیاقت شہید دی والدہ، پتر تے بھرا اج شام صدرِ مملکت توں ایہ اعزاز وصول کرن گے۔
صدرِ مملکت آصف علی زرداری نے اپنے اک بیان وچ آکھیا کہ لیاقت شہید نے اپنی جان وار کے وڈے جانی نقصان نوں ٹال دتا، لیاقت شہید دی جرات، فرض شناسی تے قربانی قوم لئی اک روشن مثال اے۔
صدر دا کہنا سی کہ لیاقت شہید نے خودکش حملہ آور دے سامنے ڈٹ کے بے مثال بہادری دا مظاہرہ کیتا، قوم اپنے بہادر سپوت لیاقت شہید نوں سلام پیش کردی اے۔
