چیئرمین پیپلز پارٹی بلاول بھٹو زرداری دے دورہ کوئٹہ دے موقعے تے پارٹی دی مرکزی رہنما شازیہ مری دی اوہناں دے نال موجودگی سیاسی حلقیاں وچ اک وار فیر بحث دا موضوع بنی رہی۔
بلاول بھٹو نے پچھلے دن اسلام آباد وچ پریس کانفرنس دے دوران صحافی دے سوال تے شازیہ مری ولوں جواب دین تے سخت ناراضگی دا اظہار کردے ہوئے اوہناں نوں جھاڑ پلائی سی، جیہڑی سوشل میڈیا تے کافی وائرل ہوئی تے سیاسی حلفیاں وچ اوہدی خوب چرچا ہوئی۔ پر جمعے دے دن چیئرمین دے دورہ کوئٹہ دے دوران شازیہ مری دی اوہناں دے نال موجودگی نے اک وار فیر سیاسی حلقیاں وچ نویں بحث چھیڑ دتی اے کہ کیا چیئرمین پیپلز پارٹی نوں شازیہ مری نال پچھلے دن اپنائے گئے رویے دا احساس ہویا اے؟ تے ایس غیر سیاسی رویے دے ازالے (بدلے) لئی اوہ شازیہ مری نوں دورہ کوئٹہ دے موقعے تے نہ صرف اپنے نال لے کے آئے بلکہ منصوبیاں دے افتتاح دے موقعیاں تے وی اوہ اوہناں دے نال موجود رہیں تے نال والی سیٹ تے وی بیٹھی رہیں۔
سیاسی حلقیاں وچ ایہہ گل وی کہی جا رہی اے کہ چیئرمین پیپلز پارٹی نوں نہ صرف اپنے رویے دا احساس ہویا اے بلکہ اوہناں نے ایس گل نوں منیا اے کہ اوہناں دا سلوک شازیہ مری نال ٹھیک نہیں سی۔
