اسلام آباد، چونگی نمبر 26 تے حالات خراب نیں ساڈے 3 بندیاں نوں گولیاں لگیاں نیں، سہیل آفریدی
پاکستان تحریک انصاف دے بانی عمران خان نال ملاقات لئی وزیر اعلیٰ خیبر پختونخوا سہیل آفریدی تے عمران خان دیاں بھیناں اسلام آباد دی چونگی نمبر 26 تے موجود نیں۔ اوہناں نے کارکنّاں نال رل کے دھرنا دتا ہویا اے۔ پولیس نے راہ بند کیتے ہوئے نیں جس پاروں اوہ اڈیالہ نہیں پہنچ سکے، پر ایس دے نال ہی اسلام آباد دے شہری وڈی گنتی وچ ٹریفک وچ پھسے ہوئے نیں۔
پولیس نے کارکنّاں نوں اگے ودھن توں روکیا ہویا اے۔ ایہوجیہیاں ویڈیو سامنے آئیاں نیں جنہاں وچ الزام لایا جا رہیا اے کہ پولیس ولوں کارکنّاں تے ربڑ دیاں گولیاں چلائیاں گئیاں نیں۔ پی ٹی آئی دے کجھ کارکنّاں دے زخمی ہون دیاں ویڈیو وی سامنے آئیاں نیں جنہاں وچ دعویٰ کیتا گیا اے کہ اوہناں نوں ربڑ دیاں گولیاں لگیاں نیں، پر ایہناں دعویاں دی آزادانہ تصدیق نہیں ہو سکی۔
ایس ساری کھچ دھوہ (کشمکش) دے دوران وزیر اعلیٰ خیبر پختونخوا سہیل آفریدی اپنی گڈی دی چھت تے چڑھے ہوئے نظر آئے۔ اوہناں نے گڈی دی چھت تے کھلو کے کارکنّاں نال خطاب وی کیتا تے اوہناں نوں پرامن رہن دی تلقین کیتی۔ سہیل آفریدی نے اپنے خطاب وچ آکھیا کہ علیمہ خان نوں گرفتار کر کے لے گئے سن، اوہ واپس آ چکیاں نیں۔ ساڈے 3 کارکنّاں (بندیاں) نوں گولیاں لگیاں نیں۔
