پنجاب وچ جعلی اینٹی بائیوٹک انجکشن G-Tax فروخت ہون اُتے الرٹ جاری
پنجاب بھر وچ جعلی اینٹی بائیوٹک انجکشن G-Tax 250mg توں متعلق کلاس ون اُتے ہائی الرٹ جاری کر دتا گیا۔
ڈائریکٹوریٹ آف ڈرگز کنٹرول پنجاب نے ڈی ٹی ایل رپورٹ دی بنیاد اُتے انجکشن نوں جعلی قرار دے دتا، صوبائی کوالٹی کنٹرول بورڈ دی منظوری توں بعد نوٹس جاری کر دتا گیا اے۔
نوٹس وچ دسیا گیا کہ جی ٹیکس 250ایم جی دا مخصوص بیچ نمبر 25c025 جعلی اے، جعلی انجکشن جہلم دے میڈیکل سٹور توں برآمد ہویا۔
رپورٹ وچ ایہہ گل وی سامنے آئی کہ مارکیٹ آتھرائزیشن ہولڈرز تے ڈسٹریبیوٹرز نوں فوری سٹاک واپس لین دی ہدایت کیتی گئی اے تے سپلائی چین دیاں مڈھلیاں تفصیلات فراہم کرن تے ری کال فارم اپ لوڈ کرن دا حکم دتا گیا اے، جدوں کہ سارے ہسپتالاں، فارمیسیاں، میڈیکل سٹوراں تے ہول سیلرز نوں فروخت فوری روکن دی ہدایت کیتی گئی۔
ایس توں علاوہ ڈرگ کنٹرول اتھارٹی نے متعلقہ اداریاں نوں متاثرہ بیچ دے سٹاک دی تفصیلات ڈرگ انسپکٹر نوں جمع کران دا حکم دتا۔
مزید برآں محکمہ صحت نے عوام نوں انتباہ جاری کیتا اے کہ بیچ نمبر 25c025 والا انجکشن ہرگز استعمال نہ کیتا جائے، جعلی انجکشن صحت لئی شدید خطرے دا باعث بن سکدا اے، شہری متاثرہ بیچ دی اطلاع صوبائی ڈرگز مانیٹرنگ سیل نوں دین۔
