ملک بھر وچ جج نہ ہون پاروں 1153 ضلعی عداڵتاں غیر فعال
ماتحت عدلیہ وچ ججاں دی گھاٹ: لاء اینڈ جسٹس کمیشن دے انکڑے
لاء اینڈ جسٹس کمیشن ولوں ماتحت عدلیہ وچ ججاں دے حوالے نال جاری کیتے گئے انکڑیاں (اعداد و شمار) مطابق، پنجاب وچ 808 تے سندھ وچ 89 عداڵتاں جج نہ ہون پاروں غیر فعال (ٹھپ) پئیاں نیں۔
دستاویزاں مطابق، بلوچستان وچ 78، پشاور وچ 149 تے اسلام آباد دی ضلعی عدلیہ وچ 29 عداڵتاں نوں ججاں دی اودیک (انتظار) اے۔ کلے پنجاب وچ ای فیملی تے سول ججاں دیاں 648 آسامیاں (سیٹاں) خالی نیں۔
(ایہ بھی پڑھو: ایف آئی اے دی مبینہ پولیس مقابلیاں بارے رپورٹ لاہور ہائیکورٹ وچ جمع)
انکڑیاں مطابق، پشاور ہائیکورٹ دے ماتحت 126 سول تے فیملی عداڵتاں جج نہ ہون وجہ توں غیر فعال نیں، جدکہ سندھ وچ سول تے فیملی ججاں دیاں 70 تے بلوچستان وچ 58 آسامیاں نویاں تعیناتیاں دی راہ تک رہیاں نیں۔
دستاویز مطابق، اسلام آباد وچ بھی 13 سول تے فیملی عداڵتاں جج نہ ہون پاروں بند پئیاں نیں۔ پورے ملک دی ضلعی عدلیہ وچ لٹکے ہوئے (زیر التواء) مقدمیاں دی گنتی 20 لکھ توں وی ودھ چکی اے۔
