گوجرہ :رکشے تے موٹر سائیکلاں وچ ٹکر نوجوان جاں بحق، 3 زخمی
سمندری روڈ اتے 367 ج ب جلیانوالہ دے نیڑے چنگ چی رکشے تے دو موٹر سائیکلاں وچکار ہون والے بھیا نک ٹریفک حادثے وچ دو نوجوان جاں بحق جدکہ تن جنے شدید زخمی ہو گئے۔
ریسکیو ذمے واراں مطابق موٹر سائیکل رکشہ سمندری توں گوجرہ آ رہیا سی کہ ساہمنے توں آؤن والی موٹر سائیکل اوہدے نال ٹکرا گئی، جیہدے نتیجے وچ موٹر سائیکل سوار دوویں نوجوان موقعے اتے ہی دم توڑ گئے۔
حادثے دے دوران اک دوجی موٹر سائیکل وی رکشے نال جا ٹکرائی، جیہدے نال ہور لوک زخمی ہو گئے۔
فوری کاروائی: اطلاع ملدے ہی ریسکیو ٹیماں موقعے اتے پہنچ گئیاں تے زخمیاں سمیت جاں بحق ہون والیاں دیاں لاشاں نوں تحصیل ہیڈ کوارٹر ہسپتال منتقل کر دتا۔
ریسکیو حکام مطابق جاں بحق ہون والے نوجواناں دی حالے تیکر پچھان نہیں ہو سکی، پر اوہناں دی عمر لگ بھگ 22 تے 16 سال دسی جا رہی اے۔
زخمیاں وچ 46 سالہ محمد عمران، 44 سالہ محمد عدنان تے 20 سالہ علی شامل نیں، جنہاں نوں طبی امداد دتی جا رہی اے، جدکہ پولیس نے وی واقعے دی تفتیش شروع کر دتی اے۔
