کوٹلی ستیاں دے جنگلاں وچ اگ دی تباہی دیاں سیٹلائٹ عکساں سامنے آ گئیاں
کوٹلی ستیاں دے جنگلاں وچ لگن والی بھیانک اگ دی تباہی دیاں سیٹلائٹ عکساں (تصاویر) سامنے آ گئیاں نیں۔
سپارکو نے “اسپیس فور کلائمیٹ” پورٹل تے کوٹلی ستیاں دے جنگلاں دی سیٹلائٹ تفصیل جاری کر دتی اے، اگ لگن نال کوٹلی ستیاں دے 25 تھانواں (مقامات) تے پھیلیا 3 ہزار 37 ہیکٹر دا قدرتی جنگل سڑ کے سوہ (خاکستر) ہو گیا۔ سیٹلائٹ عکساں وچ دَسیا گیا اے کہ کوٹلی ستیاں وچ 7 ہزار 500 ایکڑ توں ودھ تھاں تے پھیلے جنگلاں وچ تباہی ہوئی، 9 مئی توں 29 مئی تیکر دیاں سیٹلائٹ عکساں دے آمنے سامنے (موازنے) توں پتا لگا اے کہ “چیڑ” دے قیمتی جنگلاں نوں بڑا بھاری نقصان اپڑیا اے۔
کوٹلی ستیاں دی اگ نے مقامی پنچھیاں (پرندوں) تے جنگلی جیو چنتو (حیات) دی نسل ودھان (افزائش نسل) دا سیزن بڑا خراب کیتا اے، جنگل دی اگ پاروں نویں اگن والے بوٹے تے پنیریاں تباہ ہو گئیاں نیں تے زمین تے نقصان دہ جڑی بوٹیاں دے کھنڈن (پھیلنے) دا خطرہ پیدا ہو گیا اے۔ ایہدے نال ای دریاۓ سندھ تے جہلم دے اہم نکے دریاواں (ذیلی آبی ذخائر) لئی ضروری ماحولیاتی پٹی نوں تگڑا نقصان اپڑن دا ڈر اے۔
مقامی لوکاں تے محکمہ جنگلات نے کئی تھانواں تے اگ تے قابو پا لیا اے، پر تیز ہواواں چلن پاروں اجے وی خطرے منڈلا رہے نیں، ٹمری نال جڑیاں کوٹلی ستیاں دیاں ڈھلواناں تے تیز تے تتی (گرم) ہواواں پاروں اجے وی اگ کھنڈن (پھیلنے) دا سلسلہ چل رہا اے۔
