کشمیری بالاں تے تشدد انسانیت دے ضمیراُ تے سوالیہ نشان اے: مشعال ملک

حریت رہنما یاسین ملک دی گھر والی (اہلیہ) مشعال ملک نے آکھیا اے کہ کشمیری بالاں (بچوں) تے تشدد انسانیت دے ضمیر تے اک سوالیہ نشان اے۔

دنیا بھر وچ جارحیت دا شکار معصوم بالاں دے عالمی دن تے اپنے سُنیہے (پیغام) وچ مشعال ملک دا کہنا سی کہ اج دا دن مناؤݨ دا مقصد جسمانی تے دماغی تشدد دا شکار بالاں دیاں تکلیفاں بارے دَس پاؤݨا (آگاہی بڑھانا) اے، تن سالاں وچ فلسطین وچ 21 ہزار توں ودھ بال اسرائیلی بربریت (تشدد) پاروں شہید ہو چکے نیں۔

اوہناں نے آکھیا کہ ایہناں وچ ہک ہزار توں ودھ نکے ککے (شیر خوار) بال شامل نیں، جَد کہ 44 ہزار توں ودھ زخمی ہو گئے۔ زخمی فلسطینی بالاں وچوں 21 ہزار تاحیات معذوری دا شکار ہو چکے نیں۔

اوہناں دا کہنا سی کہ مقبوضہ کشمیر وچ وی بھارتی ظلم (بربریت) دا سیکڑیاں بال نشانہ بݨ چکے نیں، ہک لاکھ توں ودھ بال یتیم تے ہزاراں زخمی نیں پر کوئی پچھݨ والا نہیں، دنیا دیاں وڈیاں طاقتاں نے اسرائیلی تے بھارتی بدمعاشی تے اکھاں میٹ (بند کر) رکھیاں نیں۔

مشعال ملک نے ہور آکھیا کہ عالمی طاقتاں دی چُپ (خاموشی) ظالم دی مدد کرن دے برابر اے، کشمیری بالاں تے تشدد انسانیت دے ضمیر تے ہک سوالیہ نشان اے۔ پیلٹ گنز نال بالاں دی اکھاں دی جوت (بینائی) ای نہیں کھوئی گئی بلکہ اوہناں دے خواب تے اَگلا ویلا (مستقبل) وی ہنھیرا (تاریک) کر دتا گیا اے۔