پنجاں پانیاں دی ہانی ساڈی بولی اے

غزل

پنجاں پانیاں دی ہانی ساڈی بولی اے
سبھے بولیاں چوں رانی ساڈی بولی اے

اہندے سیوا کار جین شالا جگ تے
ڈاہڈی جانی تے پھچانی ساڈی بولی اے

گیت دوہڑے ماہیے ٹپے نالے بولیاں
ہر صنف نیں مانی ساڈی بولی اے

ہل کانگڑا ٹپیل وانجھو بھنگڑے
سمی کنکلی کھڈانی ساڈی بولی اے

جین گھبرو جوان راٹھ دیس دے
من سحبھناں دے بھانی ساڈی بولی اے

ہمتال تے پہاڑاں رنگے حوصلے
دسے سبھ دی کہانی ساڈی بولی اے

من بھاونے تے مٹھے اہندے بول نیں
یارو صدیاں پرانی ساڈی بولی اے

ایہندی سیوا وچ لنگھ گٸیاں عمراں
اسیں بیلی تے بُلانی ساڈی بولی اے۔۔

سید حاجی شاہ ساجد

اپنا تبصرہ گھلو