غزل

ارشد منظور

کردا کوئی نہ لج دیاں گلاں
کیویں لبھاں میں چج دیاں گلاں
جرم تگڑے دا ماف کر چھڈیا
اج میں سنیاں نیں جج دیاں گلاں
نال غصے دے بھاویں کردا اے
مونہوں اوہدے نیں سج دیاں گلاں
ہیرا پھیری اوہ چھوڑ سکدا نئیں
جو وی کردا اے حج دیاں گلاں
کل نوں چڑھ کے مناریاں اُتے
ویلا دسے گا اج دیاں گلاں
یارو بھکھ دا علاج روٹی اے
بھکھے ڈھڈ نوں نہ کج دیاں گلاں
اج جو سجناں نے کیتیاں ارشد
بن کے چھُریاں نیں وج دیاں گلاں