نون لیگ کساناں اُتے تشدد دی مذمت کر دی اے
لہور(پنجابی میڈیا گروپ)مسلم لیگ نون نے کساناں اُتے تشدد تے شیلنگ دی مذمت کردیاں ہوئیاں کسان اتحاد دے رہنماواں دی رہائی دا مطالبہ کر دتا۔ترجمان مسلم لیگ نون مریم اورنگزیب نے آکھیا کہ کساناں نوں روزگار دین دی بجائے گرفتار کرنا عمران صاحب دی فاسشسٹ سوچ دی عکاسی اے، ووٹ چور ظالم حکومت دے کول عوام لئی گالی، گولی تے شیلنگ دے سوا کجھ نہیں، عوام نوں جین دا حق کھون والی ظالم حکومت مظلوماں دی گل سنن اُتے وی آمادہ نہیں، ڈی چوک اُتیمنتخب وزیراعظم دے خلاف دھرنا، سول نافرمانی دا اعلان کرن والے مظلوماں دی گل سنن نوں تیار نہیں۔مریم اورنگزیب دا کہنا سی لیڈی ہیلتھ ورکرز، سرکاری ملازمین، ڈاکٹرز، طلبا اج سراپا احتجاج نیں، کساناں اُتیڈنڈے برسا کے زرعی پیداوار نوں ودھایا نہیں جا سکدا، ایہ سلوک صرف ووٹ چور ہی کرسکدے نیں، کساناں سمیت پورے پاکستان اُتے ووٹ چور ٹڈی دل نے حملہ کیتا ہویا اے، جد تک ظالم ووٹ چور حکومت نال نجات نہیں ہوگئی، کساناں سمیت ہر شعبہ زندگی اذیت وچ رہے گا، ڈنڈے تے آنسو گیس دے گولے برسان والی حکومت دے خلاف عوام سڑکاں اُتے آچکی اے۔
