اسٹیبلشمنٹ نے مذاکرات لئی رابطے کیتے نیں: مریم نواز
گلگت( پنجابی میڈیا گروپ)مسلم لیگ (ن) دی نائب صدر مریم نواز دا کہنا اے اسٹیبلشمنٹ نے میرے آلے دوالے موجود بہت سارے لوکاں نال رابطے کیتے نیں پر میرے نال براہ راست کسے نے رابطہ نہیں کیتا۔ برطانوی نشریاتی ادارے بی بی سی نوں دتے گئے انٹرویو وچ مریم نواز آکھیا میں ادارے دے مخالف نہیں آں پر سمجھنی آں جے سانوں اگے ودھنا اے تے ایس سرکار نوں گھر جانا ہووے گا۔ فوج میرا ادارہ اے، اسٹیبلشمنٹ نے مذاکرات لئی اوہناں دے آلے دوالے موجود بہت سارے لوکاں نال رابطے کیتے نیں، اسیں ضرور گل کراں گے پر آئین دے دائرہ کار وچ رہندیاں ہوئیاں۔ پی ڈی ایم دے پلیٹ فارم توں مذاکرات دے آغاز تے غور کیتا جا سکدا اے بشرطیکہ جعلی سرکار نوں گھر بھیجا جائے۔ مریم نواز دا کہنا سی مسلم لیگ (ن) دی سیاست بند گلی ول نہیں جا رہی۔ اسیں تے جتھے جا رہے آں اوتھے ہر جگہ اک ای بیانیہ گونج رہیا اے تے اوہ اے ووٹ نوں عزت دیو تے ریاست دے اُتے ریاست نہ بناؤ۔ ہن ایہ بند گلی نہیں اے، ہن ایہو راستہ اے تے ایہ راستہ آئین و قنون دی بالادستی ول جا رہیا اے۔ رہنما (ن) لیگ دا کہنا سی مائنس عمران خان فارمولے بارے میں کجھ نہیں کہواں گی پر جدوں ویلا آئے گا ویکھیا جائے گا۔ ایس حکومت دے نال گل کرنا گناہ اے۔ ایس ملک نوں بحران توں کڈھن لئی عمران خان تے حکومت نوں گھر جانا ہووے گا۔ میری نظر وچ عمران خان تے پی ٹی آئی کوئی وڈا مسئلہ ایس لئی نہیں کیوں جے میں اوہناں نوں سیاسی لوک نہیں سمجھدی۔
