پنجاب وچ سموگ دا راج ، بالاں نوں بیماری دا خدشہ
لہور( پنجابی میڈیا گروپ)روشنیاں دا شہر کراچی دنیا دے آلودہ ترین شہراں وچ تیسرے نمبر اُتے آ گیا۔ یو ایس ایئر کوالٹی انڈیکس نے شہر دے فضائی معیار نوں انتہائی آلودہ قرار دیندیاں آکھیا کراچی دی ہوا وچ آلودہ ذرات دی مقدار 372پرٹیکیولیٹ میٹرز تک جا اپڑی جہدے پاروں صبح8وجے کراچی دنیا دے آلودہ ترین شہراں وچ تیسرے نمبر تے سی۔ دوجے پاسے پنجاب وچ وی سموگ دا راج برقرار اے جہدی وجہ توں حد نگاہ انتہائی گھٹ ہو گئی اے۔ سموگ دی وجہ توں سکول جان والے بالاں وچ بیماری دا خدشہ اے۔ آئی جی پنجاب انعام غنی دی ہدایت تے سموگ دے خطریاں توں بچاؤ لئی پلس متحرک ہو گئی اے جہدے تحت چنیوٹ وچ فصلاں دی باقیات نوں اگ لاؤن والیاں دے خلاف کاروائیاں دا سلسلہ شروع ہو گیا اے۔ وکھو وکھ تھانیاں وچ 36بندیاں دے خلاف مقدمات درج کر لئے گئے جد کہ دھواں چھڈن والی گڈیاں استعمال کرن تے 4لکھ روپے توں ودھ جرمانہ لاگو کیتا گیا اے۔
