جنسی زیادتی دا شکار عورتاں دے ٹو فنگر ٹیسٹ دی شرط ختم
لہور( پنجابی میڈیا گروپ)جنسی تشدد، ریپ تے بدفعلی توں متاثرہ عورتاں دے حوالے نال وڈی خبر ایہ ساہمنے آئی اے پنجاب حکومت نے اوہناں دے طبی معائنے وچ ٹو فنگر ٹیسٹ دی شرط ختم کر دتی۔ پنجاب حکومت نے 50سال بعد متاثرہ عورتاں دے میڈیکل ٹیسٹ دا نواں طریقہ کار وضع کر دتا۔ ایڈیشنل ایڈووکیٹ جنرل پنجاب جواد یعقوب نے ٹو فنگر ٹیسٹ ختم کرن دا حکومتی نوٹیفکیشن لہور ہائی کورٹ وچ پیش کر دتا۔ عدالت نے ایڈیشنل ایڈووکیٹ جنرل پنجاب جواد یعقوب دی عدالتی معاونت نوں سراہیا ۔ جسٹس عائشہ اے ملک نے ٹو فنگر ٹیسٹ ختم کرن لئی (ن) لیگ دی ایم این اے شائستہ پرویز ملک دی عرضی تے فیصلہ محفوظ کر رکھیا اے جو آئندہ ہفتے سنایا جائے گا۔
