ماضی وچ وفاقی حکومتاں دی عدم توجہ توں بلوچستان پچھے رہ گیا: وزیراعظم

تربت(پنجابی میڈیا گروپ)وزیراعظم عمران خان دا کہنا اے وفاق دی مضبوطی لئی ساری اکائیاں دی یکساں ترقی ضروری اے۔ تربت وچ وکھو وکھ ترقیاتی منصوبیاں دی بنیاد رکھن دی تقریب نال خطاب کردیاں وزیراعظم عمران خان دا کہنا سی تربت دے عوام پاکستان دا مستقبل نیں، وفاق دی مضبوطی لئی ساری اکائیاں دی یکساں ترقی ضروری اے، بلوچستان تے سب توں ودھ فنڈنگ کر رہے آں تے اسیں بلوچستان دی ہر طرح توں مدد کراں گے کیوں جے بلوچستان ترقی کرے گا تے پاکستان ترقی کرے گا۔ وزیراعظم عمران خان آکھیا ماضی وچ بلوچستان وچ فنڈنگ نہ ہون دی وجہ توں ایہ صوبہ پچھے چلا گیا، بلوچستان وچ کدی وی اینی فنڈنگ نہیں ہوئی جنی ساڈی سرکار نے کیتی، انساناں تے سرمایہ کاری دے بغیر ملک ترقی نہیں کر سکدا، کامیابی دے حصول دا کوئی شارٹ کٹ نہیں، برے ویلے تے نکامی دا ساہمنا کرنا تے سیکھنا چاہیدا اے، انسان جدوں تک ہار نہیں من دا تے ہر مشکل توں سیکھدا اے، انسان کجھ وی کر سکدا اے۔ وزیراعظم دا کہنا سی تعلیم دے بغیر کسے معاشرے نے ترقی نہیں کیتی، علم انسان نوں دوجی مخلوقات توں منفرد بناندا اے اج اسیں پچھے رہ گئے آں تے جہڑے علاقے پچھے رہ گئے نیں اوتھے تعلیم وی گھٹ اے، ہن ٹیکنالوجی دے راہیں دور دراز علاقیاں وچ وی تعلیم حاصل کیتی جا سکدی اے، کورونا دے دناں وچ ورچوئل تعلیم دا آغاز ہویا۔