ملتان جلسہ روکن لئی قائدین اتے مقدمات قابل مذمت نیں، مصطفیٰ نواز کھوکھر

اسلام آباد (بیورو رپورٹ)ترجمان چیئرمین پیپلز پارٹی سینیٹر مصطفیٰ نواز کھوکھر نے عبدالقادر گیلانی تے قاسم گیلانی اتے مقدمات درج کرن دے حوالے توں میڈیا دے نال گل بات کردیاں ہویاںآکھیا اے کہ ملتان جلسہ روکن لئی قائدین اتے مقدمات قابل مذمت نیں۔ سرکار ایس حد تیک ڈگ گئی اے کہ سیاسی رہنمائواں اتے تالے تے زنجیر چوری دے مقدمات درج کیتے جا رے نیں۔ سینیٹر مصطفی نواز کھوکھرہوراں نے آکھیا کہ جس تیزی دے نال سرکار اخلاقی گراوٹ دا شکار اے جلد مخالفاں اتے بھینس تے بکری چوری دے مقدمات وی درج کیتے جان گے۔ انج دے اوچھے ہتھکنڈے آمر تے سلیکٹڈ ای استعمال کردے نیں منتخب سرکاراں نہیں۔ سرکار تالا چوری دے مقدمات بنائے یا توپ چوری دے ،جلسے تے ہوکے رہن گے۔ سرکار ووٹ ،آٹا تے چینی چور سرکار اپوزیشن نوں چور ی دے جھوٹھے مقدمات توں ڈرا نہیں سکدی۔ مصطفی نواز کھوکھر نے مزیدآکھیا اے کہ قوم ایس سرکار دی حقیقت جان چکی اے۔