تعلیمی اداریاں دے آلے دوالے منشیات فروشی وچ ملوث عناصر نال نبڑیا جائے: آئی جی پنجاب
لہور: آئی جی پنجاب انعام غنی نے سخت ہدایت جاری کردیاں آکھیا اے وڈے مگرمچھاں نوں ٹارگٹ کرن دے نال تعلیمی اداریاں دے آلے دوالے منشیات فروشی وچ ملوث عناصر نال آہنی ہتھاں نال نبریا جائے۔ تفصیل دے مطابق آئی جی پنجاب انعام غنی دی زیر صدارت لہور وچ جرائم کنٹرول تے ٹریفک مینجمنٹ دے حوالے نال اجلاس ہویا۔ ایس موقع تے خطاب کردیاں اوہناں دا کہنا سی منشیات فروشی دے قلع قمع لئی انٹیلی جنس بیسڈ آپریشنز وچ ہور تیزی لیاندیاں ہوئیاں ملزمان نوں پابند سلاسل کیتا جائے۔ آئی جی پنجاب دا کہنا سی کرائم ہاٹ سپاٹ ایریاز دی نشاندہی دے نال اوتھے ڈولفن تے پیرو دے پٹرولنگ پلان نوں ہور موثر بنایا جائے۔ کرائم پاکٹس وچ پیک ٹائم دے دوران سرکل افسران خود فیلڈ وچ نکل کے پٹرولنگ پلان تے صورتحال دی مانیٹرنگ کرن۔ اوہناں نے ہدایت دتی کہ ڈرائیونگ لائسنس دے اجراء لئی کمپیوٹرائزڈ روڈ سائن ٹیسٹ نوں جاری رکھدیاں ہوئیاں مانیٹرنگ وی کیتی جائے۔ ٹریفک دے بلاتعطل تے ہموار بہاؤ نوں برقرار رکھن لئی افرادی قوت دے بہترین استعمال تے جدید ٹیکنالوجی توں بھرپور فیدہ چکیا جائے۔
