سوشل میڈیا تے ہن ٹرولنگ دا جواب نہیں دیندی ایس لئی زندگی پرسکون اے: ارمینا خان

لندن: پاکستانی اداکارہ ارمینا خان دا کہنا اے ہن میں لوکاں دے کمنٹس دی وجہ توں اپنا موڈ خراب نہیں کردی۔ برطانوی نشریاتی ادارے بی بی سی نوں انٹرویو دیندیاں ’’بن روئے، جانان، شیر دل تے یلغار جہی فلماں وچ مرکزی کردار ادا کرن والی اداکارہ ارمینا خان دا کہنا اے کووڈ 19دی صورتحال پیش نظر سانوں مذہب دی تفریق کیتے بغیر سب دی مدد کرنی چاہیدی اے، جے دنیا وچ کوئی چنگا کم کرنے آں تے اللہ تعالیٰ تہانوں اوہدا دس گنا ثواب ایس دنیا وچ واپس کر دینا اے۔ اداکارہ نے ایس بارے آکھیا میں تے میرے شوہر ایہ ای سمجھدے نیں جے ساڈے کول اک موقع اے کسے دی مدد کرن لئی تے سانوں ایہنوں ضائع نہیں کرنا چاہیدا۔ اداکارہ نے سوشل میدیا تے ٹرولنگ بارے آکھیا پہلے سوشل میڈیا تے منفی کمنٹس توں پریشان ہو جاندی سی، پر ہن کمنٹس دی وجہ توں اپنا موڈ خراب نہیں کردی، لوکاں نوں جے سوشل میڈیا تے جواب نہ دتا جائے تے ایہدے نال قیامت نہیں آ جائے گی ایس لئی زندگی وی سکون وچ اے۔