ڈونلڈ ٹرمپ نے جوبائیڈن دی فتح تسلیم کر لئی

empty profile

لكهت:سہیل عبدالناصر

گرینڈ نیشنل ڈائیلاگ دی تجویز آئی اے پر ایس دوران پُلاں دے تھلیوں بوہت پانی وگ چکیا اے جنوری دا مہینہ نیڑے آ رہیا اے جس وچ اک وڈے سیاسی ٹکرائو دے رونما ہون دے سارے تر عوامل موجود نیں۔ ہن تجویزاں دا نہیں عمل دا ویلا اے۔ ایس توں پہلے کہ حکومت تے اپوزیشن اک دوجے نال ٹکران تے ملکی نظام نوں ہلا دین۔ ہوش مند سرعت نال اگے آن تے تصادم دی راہ روکن تے ایس مقصد دے حصول لئی نتیجہ خیز گل بات دا آغاز کیتا جائے۔ گلگت بلتستان دے الیکشن نے اپوزیشن دی تحریک نوں، احتجاج لئی توانائی دا نواں ذریعہ فراہم کر دتا اے۔ کئی دن توں گلگت وچ پرتشدد مظاہرے جاری نیں۔ سرکاری املاک نوں نذر آتش کیتا گیا اے۔ نویں ورھے دے آغاز اُتے ایہہ منظر ملک دے دوجے حصیاں تیکر ودھ سکدا اے۔
اپوزیشن لئی ایہہ اک عمدہ صورتحال اے پر حکومت لئی قطعا نہیں کیوں جے اک پاسے وفاقی حکومت کرونا دی مہلک، دوجی لہر اُتے قابو پان، معاشی بحران توں نکلن، مہنگائی نال نبڑن تے اپنی صفاں برقرار رکھن اُتے توجہ مرکوز کیتے ہوئے اے تے دوجے پاسے ایہنوں مخالفین دیاں چالاں دا وی توڑ کرنا اے۔ عمران خان دی حکومت اپنے مسائل نوں جنہا گھٹ کرے گی اینا ای ایس دے حق وچ بہتر ہوئے گا۔ کسے وی حکومت لئی اپوزیشن نوں دندان شکن جواب دین دا بہترین راہ ایہو ہوندا اے کہ گورینس بہتر کیتی جائے تے عوام نوں ریلیف دتا جائے۔ وزیراعظم، وفاقی شماریات ڈویژن دے اعداد و شمار تے کجھ سرکاری رپورٹاں اُتے کلی بھروسہ کرن دے بجائے اپنے ذاتی وسائل بروئے کار لیا کے حالات توں آگاہی حاصل کرن دی کوشش کرن تے ایہناں اُتے واضح ہو جائے گا کہ عوام کس حد تیکر مطمئن نیں۔ حکومت نوں جے اپنے ای چیلنج درپیش نیں تے اپوزیشن وی ایس توں مبرا نہیں۔ اطلاعات دے مطابق اسلام آباد دی میٹنگ دے دوران مولانا فضل الرحمن تے پی ٹی ایم دے محسن داوڑ دے وچکار تلخ گل بات ہوئی۔ پی ٹی ایم ، خیبر پختونخواہ دے سابق قبائلی علاقیاں تے بلوچستان دی پشتون بیلٹ وچ پیر جمان لئی کوشاں اے جد کہ ایہو علاقے جمعیت علماء اسلام دا حلقہ اثر وی نیں چناں چے ایہناں جماعتاں دا آمنا سامنا تے ہوئے گا۔ ایس لئی باور کیتا جاندا اے کہ کسے موقعے اُتے پی ڈی ایم توں علیحدگی اختیار کرن والی پہلی جماعت پی ٹی ایم ہو سکدی اے۔ ایدھے امریکہ دے صدر ڈونلڈ ٹرمپ نے آخر کار صدارتی الیکشن وچ ہار تسلیم کردے ہوئے جوبائیڈن نوں انتقال اقتدار دی تیاری کرن دا کہہ دتا اے۔ ڈونلڈ ٹرمپ دے دور وچ افغان امن عمل دے حوالے نال امریکہ کھلے عام پاکستان لئی ممنونیت دا اظہار کردا رہیا اے پر خدشہ اے کہ ہن اظہار تشکر دے بجائے، ماضی دے ڈومور جہے مطالبات دا اعادہ وی ہو سکدا اے۔ گوانڈھی ملک ہون دے ناطے تے معاشی و سلامتی دے ثمرات دے پیش نظر، افغان امن عمل وچ پاکستان دی گہری دلچسپی اے۔ اک دن پہلے ای وزیر خارجہ شاہ محمود قریشی نے کہیا کہ پاکستان، افغان امن عمل دا اک وڈا سٹیک ہولڈر اے۔ ویکھنا ایہہ وے کہ جوبائیڈن انتظامیہ، افغانستان وچ قیام امن لئی ٹرمپ انتظامیہ جہے جوش و خروش دا مظاہرہ کرے گی؟ افغان نژاد امریکی دانشور، ذلمے خلیل زاد، افغان امن عمل دی جان نیں تے ایہناں ای دی کوششاں نال امن عمل ایس مقام اُتے اپڑیا اے۔ جے نویں انتظامیہ ایہناں نوں نمائندہ خصوصی دے منصب اُتے برقرار رکھدی اے تے افغانستان وچ قیام امن دی امید قائم رہوے گی۔ نویں حکام لیائے گئے تے ایہناں نوں افغان امور نوں سمجھن لئی خاصی مدت درکار ہوئے گی۔ انج امن دی منزل دور ہوندی جاوے گی۔ حال ای وچ گرینڈ نیشنل ڈائیلاگ دی تجویز نے اک غلغلہ برپا کیتا اے۔ ایہہ تجویز ڈی جی آئی آئی ایس آئی لیفٹیننٹ جنرل فیض حمید نال منسوب کیتی جاندی اے جیہڑی اوہناں نے نیشنل ڈیفنس یونیورسٹی دے اک حالیہ تربیتی کورس دے شرکاء نال خطاب کردے ہوئے دتی۔ این ڈی یو ملک دا اک اہم تعلیمی ادارہ اے جتھے مسلح فوجاں متعلق پیشہ وارانہ مضمون دی اعلیٰ تعلیم دین دے علاوہ عصری علوم دی ترویج دا وی بندوبست اے۔مختلف شعبہ ہائے زندگی دی نمایاں شخصیات نوں ملکی سلامتی دے چیلنجاں تے تصورات نال روشناس کران لئی ایتھے باقاعدگی نال تربیتی ورکشاپاں منعقد کیتیاں جاندیاں نیں۔ پالیسی سازی تے فیصلہ سازی وچ حصہ لین والے قائدین نوں بطور مقرر مدعو کیتا جاندا اے تے گل بات دے اختتام اُتے بے تکلفانہ سوال و جواب دی نشست ہوندی اے۔ ساری کاروائی آف دی ریکارڈ ہوندی اے جس دا فائدہ ایہہ ہوندا اے کہ ممنوع تے ناپسندیدہ موضوعات اُتے وی کھل کے گل بات ہوندی اے جدوں جنرل اشفاق پرویز کیانی ڈی جی آئی ایس آئی سن اودوں مینوں وی این ڈی یو وچ اک انج دی ای نشست دے دوران ایہناں توں سیاست وچ مداخلت تے لاپتہ بندیاں دے بارے وچ تیکھے سوال پچھن دا موقع ملیا۔جنہاں دے اوہناں نے نہایت دلچسپ تے ہوش ربا جواب دتے۔ باور کیتا جاندا اے کہ لیفٹیننٹ جنرل فیض حمید نے وی اک انج دے ای موقعے توں استفادہ کردے ہوئے گرینڈ نیشنل ڈائیلاگ دی افادیت اجاگر کیتی جیہڑی بہرحال ایس امر دی غماز اے کہ ملک وچ مکالمے دی بوہت لوڑ اے پر گل ہوئے تے کیوں کر ہوئے، کیوں جے سیاست دے سارے فریق اپنی اپنی انتہائواں اُتے کھڑے نیں۔
ہاں، عوام نوں پیش آئے مسئلے تے ریاست نوں لاحق چیلنجاں دے حل اُتے مبنی ایجنڈا ، اخلاص تے لگن جہے عوامل گل بات لئی اک پرکشش موقع فراہم کر سکدے نیں۔ تحریک لبیک دے سربراہ مولانا خادم حسین رضوی وفات پا گئے نیں۔ آتش بیانی تے دعویٰ حب رسول ایہناں دے اہم اثاثے سن۔ ایہناں دے بعد تحریک دا اثر قائم رکھنا بوہت مشکل ہوئے گا۔ محمد نواز شریف تے شہباز شریف دی والدہ بیگم شمیم اختر وی اللہ نوں پیاری ہو گئیاں۔ وزیراعظم عمران خان، آرمی چیف جنرل قمر جاوید باجوہ تے سیاسی برادری ، دونواں بھراواں نال تعزیت کر رہی اے۔ ایس ضمن وچ چوہدری برادران دی نواز شریف نال تعزیت نوں سب توں اہم رابطہ قرار دتا جا سکدا اے۔ ایہہ سطراں مکمل ہون توں پہلے بزرگ سیاست دان تے دانشور جناب انور عزیز دی رحلت دی خبر وی آئی گئی۔

اپنا تبصرہ گھلو