‘جلسیاں نال عمران خان نہیں جان والے: حکومت5ورھیے پورے کریگی’

راولپنڈی(پنجابی میڈیا گروپ) شیخ رشید نے آکھیا اے کہ جلسیاں نال عمران خان نہیں جان والے، تحریک انصاف حکومت پنچ ورھیے پورے کرے گی،حکومت اپوزیشن نال نیب تے این آر او توں علاوہ گل بات لئی تیار اے۔وزیر ریلوے شیخ رشید نے راولپنڈی ریلوے سٹیشن اُتے پریس کانفرنس کردیاں ہوئیاں آکھیا کہ فضل الرحمان نے لاٹھی دا جواب لاٹھی نال دین دی گل کیتی، اوہناں نوں میں آکھ رہیاواں کہ لاٹھی دی گل نہیں قانون دی بالادستی لئی گل اے، فضل الرحمان بند گلی وچ نہ جان، سیاسی اناڑی ڈرائیونگ کرن گے تے حادثے ہون گے۔شیخ رشید دا کہنا سی کہ شہباز شریف تے نواز شریف دے بیانیے وچ واضح فرق اے، شہباز شریف نے قومی سطح اُتے مذاکرات دی چنگی گل کیتی۔ اوہناں نے آکھیا کہ پاک فوج ملکی سرحداں اُتے جاری صورتحال توں غافل نہیں، پاکستان نوں سرحد توںکوئی خطرہ نہیں، اندورنی خطرہ اے، دنیا وچ کوئی ایسا ملک نہیں جیتھے اداریاں دا کردار نہیں۔