ایل ڈی اے دی 4ہزار سستے اپارٹمنٹس تعمیر کرن دی منظوری

لہور: ایل ڈی اے نے 10ارب روپے نال 4ہزار سستے اپارٹمنٹس تعمیر کرن دی منظوری دے د تی۔ وائس چیئرمین ایس ایم عمران دی زیر صدارت ایل ڈی اے دی گورننگ باڈی دا ستواں اجلاس ہویا جہدے وچ 10ارب روپے دی لاگت نال 4ہزار سستے اپارٹمنٹس تعمیر کرن تے 35ہزار اپارٹمنٹس تعمیر کرن لئی مختص ساڈھے 8ہزار کنال اراضی تے انفراسٹرکچر دی تعمیر لئی تقریباً20ارب روپے کے پی سی ون دی منظوری دتی گئی، ایہ اپارٹمنٹ موضع ہلوکی وچ 563کنال اراضی تے اک سال وچ تعمیر کیتے جان گے۔ چار منزلہ اپارٹمنٹس دے 125بلاک تعمیر کیتے جان گے تے بلاک 32رہائشی یونٹاں تے مشتمل ہووے گا جد کہ ایتھے کئی مساجد وی تعمیر کیتی جان گیاں۔ اجلاس وچ ایل ڈی اے سٹی نواں پاکستان اپارٹمنٹس دی تعمیر نوں قابل عمل منصوبہ بنان لئی پیش کیتے جان والے فنانشل ماڈل دی وی منظوری دتی گئی جد کہ اپارٹمنٹس خریدن دے خواہشمند بندیاں لئی نواں پاکستان ہاؤسنگ اتھارٹی قومی بینکاں ولوں مارگیج فنانسنگ دی سہولت دی فراہمی دی تفصیلات توں وی آگاہ کیتا۔