العزیزیہ تے ایون فیلڈ ریفرنسز: اسلام آباد ہائی کورٹ نے نواز شریف نوں اشتہاری قرار دین دا تحریری فیصلہ جاری کردتا

اسلام آباد(بیورو رپورٹ)العزیزیہ تے ایون فیلڈ ریفرنسزوچ اسلام آباد ہائی کورٹ نے نواز شریف نوں اشتہاری قرار دین دا تحریری فیصلہ جاری کردتااے۔ جسٹس عامر فاروق تے جسٹس محسن اخترکیانی اتے مشتمل ڈویژن بنچ توں جاری 3صفحات اتے مشتمل فیصلہ وچ آکھیا گیا اے کہ نواز شریف نوں عدالت پیش ہون دا بار بار موقع دتا گیا،نواز شریف دے خلاف شواہد دے مطابق اشتہاری قرار دین دی کارروائی مکمل اے،ایس توں پہلاں نوازشریف دے ناقابل ضمانت وارنٹ گرفتار ی جاری کیتے گئے سن شواہد تے گواہاں دی روشنی وچ نوازشریف جان بجھ کے عدالت دے ساہمنے پیش نہیں ہوئے۔نواز شریف نوں عدالتی کارروائی دا مکمل ادراک سی، نواز شریف نوٹسز، وارنٹ گرفتاری، اشتہارات دے باوجود پیش نہ ہوئے،نواز شریف نوں العزیزیہ تے ایون فیلڈ ریفرنسز وچ اشتہاری قرار دتا جاندا اے۔ عدالت داآکھنا اے کہ نوازشریف جان بجھ کے عدالتی کارروائی دا حصہ نہیں بن رہے ،نوازشریف نوں عدالتی طبی تے کیس وچ پیشی دا علم اے۔