وکیلاں دی جرأت کیویں ہوئی ہسپتال تے حملہ کرن دی: لہور ہائیکورٹ

لہور: جسٹس علی باقر نجفی نے درخواستاں تے سماعت دے دوران ریمارکس دیندیاں گرفتار وکیلاں ولوں پیش ہون والے اعظم نذیر تارڑ ایڈووکیٹ توں آکھیا تہانوں ہسپتال تے حملے دی جرات کیویں ہوئی، تہانوں اندازہ نہیں اسیں کہڑے دکھ وچ آں، کیہ کوئی بار کونسل کاروائی کرے گی؟ تفصیلات دے مطابق پنجاب انسٹی ٹیوٹ آف کارڈیالوجی تے حملے وچ ملوث ملزمان وکیلاں دی رہائی دی 4درخواستاں تے جسٹس علی باقر نجفی دی سربراہی وچ دو رکنی بنچ نے سماعت کیتی۔ ایس موقع تے اعظم نذیر تارڑ ایڈووکیٹ نے اپنے دلائل وچ آکھیا پلس نوں کسے تے تشدد کرن دا اختیار نہیں، اسیں کوئی بھارت نال جنگ لڑن نہیں آئے۔ ایہدے تے جسٹس علی باقر نجفی نے اظہار برہمی کردیاں آکھیا ہاں تسیں جنگ لڑن ای آئے او۔

تہاڈی ہسپتال تے حملہ کرن دی جرات کیویں ہوئی؟ جسٹس انور الحق پنوں نے ریمارکس دتے کیہ تسیں وضاحت دے سکدے او کہ کیوں حملہ کیتا گیا۔

جے بار کونسل تے اجہی کاروائی ہووے تے کیہ کراں گے؟ ایہدا جواب دیندیاں اعظم نذیر تارڑ ایڈوکیٹ نے آکھیا اسیں ٹی وی پرگراماں تے ایس واقعہ دی مذمت کیتی اے۔ جسٹس علی باقر نجفی دا کہنا سی تسیں ایہنوں وقوعہ کہندے او؟ تہانوں اندازہ نہیں کہ اسیں کہڑے کرب وچ مبتلا آں۔ اعظم نذیر تارڑ آکھیا ساڈا اک اجہیا بار لیڈر نہیں اے جہنے ایس وقوعہ دی وضاحت دین دی کوشش کیتی ہویو، جہڑے ملوث نیں، ایہناں دے لائسنس معطل کیتے جان گے۔ جسٹس علی باقر نجفی آکھیا وکیلاں وچ کالی بھیڈاں موجود نیں۔ جنگل دے قنون وچ معاشرے نہیں بچدے تے جو اوہناں نے کیتا اوہ جنگل دا قنون اے

۔ فیصلہ تے اسیں ای کراں گے، اسیںحلف چکیا ہویا اے۔ عدالت نے وکیلاں دی گرفتاریاں تے سی سی پی او لہور توں رپورٹ طلب کردیاں ایہناں دے میڈیکل کران دے فیصلہ تے عملدرآمد دا حکم دتا تے سماعت 16دسمبر تک ملتوی کر دتی۔