راولپنڈی اسلام آباد وچ میٹروبس ملازمین دی دوبارہ ہڑتال

راولپنڈی ( بیورو رپورٹ )راولپنڈی اسلام آباد وچ میٹروبس ملازمین نے دوبارہ ہڑتال کردتی۔ملازمین داآکھنا سی اے کہ میٹرو انتظامیہ نے پچھلے احتجاج وچ کیتے گیء وعدے پورے نہیں کیتے۔ ملازمین نے سارے سٹیشنز اتے ٹکٹنگ بوتھ بند کردتے جہدے نتیجے وچ مسافراں نوں شدید پریشانی دا ساہمنا اے۔ میٹرو بس ٹکٹنگ ملازمین نے تنخواہاں تے کرونا فنڈز نہ ملنے اتے پچھلے ماہ ہڑتال کرکے میٹرو ٹریک اتے دو روز تیک دھرنا دتا سی۔ جہدے اتے میٹرو بس انتظامیہ نے سارے ملازمین دے واجبات ادا کرن دی یقین دہانی کرائی سی تے ملازمین نے احتجاج ختم کرکے میٹرو بس سروس بحال کردتی سی۔ ملازمین نے ہن دوبارہ ہڑتال کردیاں ہویاں آکھیا اے کہ میٹرو بس انتظامیہ نے کوئی وی وعدہ پورا نہیں کیتا۔ ملازمین نوں چار ماہ توں تنخواہاں تے دیگر واجبات ادا نہیں کیتے گئے۔