پی آئی سی حملہ، وکیلاں دے اعتراض تے لہور ہائیکورٹ دے ججاں دی سماعت توں معذرت

لہور: پی آئی سی تے حملے وچ گرفتار وکیلاں دے وکیل ولوں رہائی دی درخواستاں دی سماعت کرن والے فاضل ججاں تے اعتراض دے بعد بنچ ٹُٹ گیا اے۔

جسٹس علی باقر نجفی تے جسٹس انور الحق پنوں تے مشتمل لہور ہائی کورٹ دے 2رکنی بنچ نے گرفتار وکیلاں دی رہائی دی درخواستاں تے سماعت کیتی۔ سنوائی دے دوران گرفتار وکیلاں دے وکیل نے بنچ تے اعتراض کر دتا۔

جہدے تے فاضل بنچ نے درخواستاں تے سماعت توں معذرت کردیاں معاملہ چیف جسٹس لہور ہائی کورٹ نوں گھل دتا۔

دوران سماعت جسٹس علی باقر نجفی نے ریمارکس دتے ہسپتال تے حملہ کرن دی جرات کیویں گیتی گئی، کیہ تسیں وضاحت دے سکدے او کیوںحملہ کیتا گیا، تہانوں اندازہ نہیں اسیں کہڑے دکھ وچ آں، اسیں بڑی مشکل نال ایس کیس دی سماعت کر رہے آں، دکھ ایس گل دا اے تسیں ایہدے تے وضاحت دے رہے او، سانوں تسیں کدھرے دا نہیں چھڈیا، ایس طرح تے جنگاں وچ وی نہیں ہوندا۔ کاروائی دے دوران فاضل بنچ نال مکالمے دے دوران وکیلاں دے وکیل اعظم نذیر تارڑ نے موقف اختیار کیتا کہ اسیں کوئی بھارت نال جنگ لڑن نہیں آئے، وکیلاں ولوں کہرام کیوں نہ برپا ہویا، پلس نوں کسے تے تشدد کرن دا اختیار نہیں اے، اسیں وضاحت نہیں کر رہے سگوں مذمت کر رہے آں، اسیں ٹی وی پروگراماں تے مذمت کیتی اے، اسیں ملوث وکیلاں دے خلاف کاروائی کرن جا رہے آں۔