25ہزار دے نویں پرائز بانڈز دی فروخت تے پابندی لاگو

کراچی( پنجابی میڈیا گروپ) پاکستان نے فنانشل ایکشن ٹاسک فورس دی ایک ہور شرط پوری کردیاں 25ہزار روپے دے نویں پرائز بانڈز دی فروخت تے فوری طور تے پابندی لاگو کر دتی۔ 25ہزار روپے دے غیر رجسٹرڈ انعامی بونڈز ختم کرکے اوہناں دی تھاں 25ہزار روپے مالیت دے پریمیم رجسٹرڈ انعامی بونڈز متعارف کروا دتے گئے۔ فنانس ڈویژن نے 25ہزار پرائز بانڈز لئی نواں ہدایت نامہ جاری کر دیاں آکھیا کہ 31مئی 2021ء توں 25ہزار دے پرائز بانڈ ناقابل استعمال ہون گے۔ اسٹیٹ بینک، نیشنل بینک سنے 5بینکاں دی 16برانچاں توں تبدیل کروائے جا سکدے نیں، انعامی رقم دے حصول لئی پرائز بانڈ شناختی کارڈ دی کاپی دے نال اسٹیٹ بینک وچ جمع کرانا ہووے گا۔ فنانس ڈویژن دے مطابق بانڈ کیش کروان والا بندہ ذاتی حیثیت وچ اپنے اکاؤنٹ وچ رقم منتقل کروا سکے گا، بانڈز نوں قومی بچت توں سپیشل سیونگز یا ڈیفنس سیونگ سرٹیفکیٹس وچ تبدیل کروایا جا سکدا اے۔ وزارت خزانہ حکام دا کہنا اے ایس اقدام نال پاکستان نوں فیٹف گرے لسٹ توں نکلن وچ مدد ملے گی۔