مولانا فضل الرحمان سنے 20سیاستداناں تے دہشتگرد حملیاں دا خطرہ اے: وزیر داخلہ
اسلام آباد: وفاقی وزیر داخلہ شیخ رشید دا کہنا اے مولانا فضل الرحمان سنے 20نامور سیاستداناں دی زندگیاں خطرے وچ نیں تے ہائی الرٹ جاری کر دتا گیا اے۔ اسلام آباد وچ میڈیا نال گل کردیاں وزیر داخلہ شیخ رشید دا کہنا سی دیس وچ سی پیک دے خلاف سازش ہو رہی اے تے شدید خطرات لاحق نیں، پر ساڈی فورسز نے سی پیک دے خلاف کسے تھریٹ نوں کامیاب ہون نہیں دتا۔ سیاستداناں تے وی حملے ہو چکے نیں تے ایس ویلے پاکستان دے 20نامور سیاستداناں دی زندگیاں نوں شدید خطرات اے تے تھریٹ الرٹ جاری کر دتا گیا۔ مولانا فضل الرحمان تے حملے دا خدشہ اے تے اوہناں نوں وی آگاہ کر دتا اے۔
وزیر داخلہ دا کہنا سی نوازشریف ملکی اداریاں دے خلاف بیانیہ رکھدے نیں، کوئی اجیہا آرمی چیف تے جج نہیں جہدے نال اوہناں نے تصادم نہ کیتا ہووے، نوازشریف نے اپنی سیاست نوں آپ دفن کیتا اے، اوہناں توں گزارش اے کہ لوکاں نوں امتحان وچ نہ پاؤن، منی لانڈرنگ تے کرپشن کرن والے نہیں بچ سکن گے، عمران خان اجہی قنون سازی کرن گے کوئی کرپٹ نہیں بچے گا۔شیخ رشید آکھیا مولانا فضل الرحمان توں گزارش اے کہ ذاتی لڑائی نہ لڑن، اوہ ایس اسمبلی نوں ناجائز کہہ رہے نیں جہدے وچ اوہ آپ صدارتی امیدوار سن، ہن اوہناں دا کوئی سیاسی مستقبل نہیں، مولانا فضل الرحمان دا خواب کدی پورا نہیں ہووے گا۔
