سینیٹ انتخابات 10فروری توں پہلاں نہیں ہو سکدے: الیکشن کمیشن
اسلام آباد: سینیٹ انتخابات بارے الیکشن کمیشن آف پاکستان دا بیان ساہمنے آ گیا۔ الیکشن کمیشن آکھیا اے سینیٹ انتخابات 10فروری توں پہلاں نہیں ہو سکدے، عام طور تے ایوان بالا دے انتخابات مارچ دے پہلے ہفتے وچ ہوندے رہے نیں، سینیٹ دے ادھے ارکان 11مارچ 2021نوں ریٹائر ہو رہے نیں، ایس وار وی الیکشن کمیشن آئین تے قنون دے مطابق مناسب ویلے تے انتخابات دی تریخ جاری کرے گا۔ ترجمان الیکشن کمیشن آکھیا آئین دے مطابق سینیٹ انتخابات دا انعقاد ساڈی آئینی تے قنونی ذمہ داری اے، آئین تے قنون دی روشنی وچ اپنی ذمہ داریاں مکمل کرن لئی پرعزم آں۔ واضح رہے سرکار نے سینیٹ الیکشن قبل از وقت کران تے خفیہ رائے شماری دی بجائے شو آف ہینڈ نال (ہتھ کھڑا کرکے) کران دا فیصلہ کیتا اے۔ وزیراعظم عمران خان نے ایس حوالے نال سپریم کورٹ جان دا وی اعلان کیتا اے۔
