عوامی طاقت نال اسلام آباد جا کے عمران خان توں استعفیٰ کھواں گے: بلاول بھٹو زرداری

لہور: چیئرمین پیپلزپارٹی بلاول بھٹو زرداری دا کہنا اے لانگ مارچ وچ عوام نوں نال لے کے جاواں گے تے اسلام آباد اپڑ کے استعفے کھوہ کے لواں گے۔ لہور وچ میڈیا نال گل کردیاں بلاول دا کہنا سی سرکار زمینی حقائق توں واقف نہیں، عوام تاریخی مہنگائی تے بیروزگاری دا مقابلہ کر رہے نیں، اوہناں نوں دو ویلے دی روٹی میسر نہیں، سرکار اپنے کساناں دے بجائے دنیا توں خریداری کر رہی اے، عوام اپنے مسئلے حل نہ ہون تے خودکشیاں کرن تے مجبور نیں، سرکار موجودہ نظام توں عوام دی نفرت نوں محسوس نہیں کر رہی، کٹھ پتلی وزیراعظم دے کول جواب نہیں کہ عوام لئی کیہ کراں گے، جے اوہ عوام دے مسئلے حل نہیں کر سکدے تے اوہناں نوں استعفیٰ دینا چاہیدا اے۔ بلاول بھٹو دا کہنا سی پی ڈی ایم دی ساری 11جماعتاں متحد نیں تے ایہناں وچ کوئی اختلاف نہیں، اسیں طے کر رکھیا اے کہ حکومتی رویے دے خلاف ڈٹ کے مقابلہ کراں گے، ساڈے نکلن دا مقصد سرکار نوں گھر بھیجنا اے، لانگ مارچ تے ہونا ای ہونا اے، پی ڈی ایم فیصلہ کرے گی کہ لانگ مارچ کدوں تے کیویں کرنا اے، پر جہڑا وی فیصلہ ہویا اسیں لانگ مارچ وچ عوام نوں نال لے کے جاواں گے۔