اپوزیشن نے نیب قنون وچ ترمیم دی صورت وچ لکھ کے این آر او منگیا: وزیراعظم

اسلام آباد( پنجابی میڈیا گروپ) وزیراعظم عمران خان دا کہنا اے اپوزیشن نے نیب قنون وچ ترمیم دی صورت وچ لکھ کے این آر او منگیا۔ وزیراعظم عمران خان دی صدارت وچ پارٹی رہنماواں تے ترجماناں دا اجلاس ہویا جہدے وچ مشیر داخلہ شہزاد اکبر نے ترجماناں نوں اپوزیشن دی نیب قنون وچ تجویز تے بریفنگ دیندیاں دسیا کہ ترامیم توں اپوزیشن رہنماواں نوں کیہ فائدہ ہونا سی، اجلاس وچ گل کردیاں وزیراعظم عمران خان نے پارٹی ترجماناں نوں نیب قنون وچ اپوزیشن ولوں تجویز کیتی ترامیم عوام دے ساہمنے لیان دی ہدایت کردیاں آکھیا اپوزیشن نے نیب قنون وچ ترمیم دی صورت وچ لکھ کے این آر او منگیا ، اوہناں دا مطالبہ اے کرپشن تے نااہلی دی سزا ختم ہووے تے اک ارب توں گھٹ کرپشن تے نیب کاروائی نہ کرے۔ اجلاس وچ سینیٹ انتخابات دے طریقہ کار وچ تبدیلی تے وی بریفنگ دتی گئی جہدے تے وزیراعظم عمران خان آکھیا سینیٹ دے شفاف انتخابات تے اپوزیشن دا دہرا معیار ساہمنے آیا اے، اسیں شفاف سینیٹ الیکشن کرانا چاہنے آں، اپوزیشن کہندی اے اسیں شفاف انتخابات لئی نکلے آں پر دوجے پاسے اوپن بیلٹ انتخابات دی مخالفت کر رہے نیں۔وزیراعظم عمران خان نے وفاقی وزیراں نوں کارکردگی تے توجہ دین دی ہدایت کردیاں آکھیا نظام دی تبدیلی چاہندے او تے ہر کابینہ نوں اضافی محنت کرنی پوے گی۔