پی ڈی ایم سینیٹ الیکشن وچ حصہ لوے گی، استعفیاں تے دوبارہ غور وی ہووے گا: شیخ رشید

اسلام آباد: شیخ رشید آکھیا اے لانگ مارچ تے لونگ مارچ وچ فرق اے، پی ڈی ایم سینیٹ الیکشن وچ حصہ لوے گی، استعفیاں تے دوبارہ غور وی ہووے گا، آصف زرداری نے کرمنالوجی وچ پی ایچ ڈی کر رکھی اے۔ وزیر داخلہ شیخ رشید نے اسلام آباد وچ میڈیا نال گل کردیاں آکھیا مراد علی شاہ نے وزیراعظم بلاول دا نعرہ لایا، جے تہانوں انڈر 19دے نال ای کھیڈنا اے تے دوجیاں دے حال تے رحم کرو۔ اوہناں آکھیا کمپیوٹرائزڈ استعفیاں دا کوئی مطلب نہیں ہوندا، ہتھ نال لکھ کے دیو، چنگی گل اے ایہ سینیٹ الیکشن وچ حصہ لین گے، تسیں ویکھو گے ایہ استعفے وی نہیں دین گے۔ شیخ رشید دا کہنا سی سب لوکاں دی لڑائی عمران خان توں ودھ نیب نال اے، آصف زرداری نے جیلاں وچ زیادہ زندگی گزاری، اوہناں نے کرمنالوجی وچ پی ایچ ڈی کیتی اے، آصف زرداری نے جیلاں بھرن دی گل کیتی، اوہناں نوں علم اے جیل دے اثرات توں بچن لئی کیہ کرنا ہوندا اے، آصف زرداری نے جیلاں توں ودھ ویلا ہسپتال وچ گزاریا۔