عدالتاں پلس دے ماتحت نہیں ایہ گل سی سی پی او دے کان وچ پا دیو: لہور ہائیکورٹ

لہور: ہائی کورٹ نے سی سی پی او عمر شیخ تے برہمی دا اظہار کردیاں ہویاں آکھیا اے لہور وچ ایسے طرح ڈکیتیاں چوریاں ہو رہیاں نیں، 3مہینے وچ سب ٹھیک کرن دا دعویٰ سی پر کجھ نہیں ہویا۔ ہائی کورٹ نے لہور دے شہری نوں ہراساں کرن دے خلاف عرضی دی سماعت کیتی جہدے دوران سی سی پی او لہور عمر شیخ، ڈی سی لہور تے ایس پی کینٹ نوں طلب کر لیا گیا۔ درخواست گزار نے دسیا کہ ڈیفنس وچ دو کنال اراضی دا مالک آں تے مینوں سی سی پی او لہور دے کہن تے ہراساں کیتا جا رہیا اے۔

چیف جسٹس لہور ہائی کورٹ نے سرکاری وکیل توں آکھیا شہر وچ ڈکیتیاں چوریاں ایسے طرح ہو رہیاں نیں جہڑا دعویٰ سی 3مہینے وچ سب ٹھیک ہو جائے گا کجھ نہیں ہویا، اپنے ایس افسر توں کہہ دیو جہڑا کہندا اے کہ عدالتاں ضمانتاں لے لیندیاں نیں، ایہنوں دسو عدالتاں قنون دے مطابق ضمانتاں لیندیاں نیں۔ عدالتاں پلس دے ماتحت نہیں ایہ گل سی سی پی او دے کان وچ پا دیو۔ اوہناں دی اپنی نالائقی اے کہ ملزمان بری ہو جاندے نیں تے ذمہ داری عدالتاں تے پا دتی جاندی اے، تہاڈے شکرے ایتھے گدھ بن کے بیٹھے نیں پر عدالتاں نے ایہناں دے کہن تے کم نہیں کرنا، ایہناں دی گالھاں کھان لئی عدلیہ نہیں بیٹھی ہوئی سگوں اسیں عوام دے نوکر آں۔