کورونا وائرس نال ہور 55موتاں، 1974نویں کیس رپورٹ

اسلام آباد: دیس بھر وچ 24گھنٹیاں دے دوران کورونا وائرس نال 55بندے جاں بحق ہو گئے تے 1974نویں کیس رپورٹ ہوئے جد کہ کووڈ 19دے مثبت کیساں دی شرح 6.13فیصد ہو گئی۔ نیشنل کمانڈ اینڈ آپریشن سنٹر دے مطابق دیس بھر وچ کورونا فعال کیساں دی تعداد 39ہزار 488اے تے ہن تک 9ہزار 929موتاں ہو چکیاں نیں۔پچھلے 24گھنٹیاں دے دوران 32ہزار 205ٹیسٹ کیتے گئے تے وباء پھیلن مگروں ہن تک کیتے گئے ٹیسٹاں دی تعداد 65لکھ 89ہزار 317ہو گئی اے۔

کورونا وائرس دے مریضاں دی تعداد4 لکھ 73 ہزار 309 ہوگئی اے۔ سندھ وچ 2 لکھ 11 ہزار 276، پنجاب ااک لکھ 36 ہزار 147 کیسز، خیبرپختونخوا 57 ہزار 467، بلوچستان وچ 18 ہزار 082 کیس، اسلام آباد 37 ہزار 272، گلگت بلتستان وچ 4 ہزار 850 تے آزاد کشمیر وچ کورونا دے 8 ہزار 215 کیسز رپورٹ ہوچکے نیں۔صحت یاب ہون والیاں دی تعداد4لکھ 23ہزار 892اے۔ 2263مریضاں دی حالت تشویشناک اے تے ایس تعداد وچ تیزی نال وادھا ہو رہیا اے۔این سی او سی دے مطابق مثبت شرح دے لحاظ نال ایبٹ آباد سب توں اگے اے جتھے شرح 15.95فیصد تک جا اپڑی۔ کراچی 14.81دے نال دوسرے تے حیدر آباد 14.47فیصد دے نال تیسرے نمبر اُتے اے۔