پی ڈی ایم دے احتجاج،لانگ مارچ دے نال سرکار نہیں جاوے گی،شاہ محمود قریشی

اسلام آباد(بیورو رپورٹ) وزیر خارجہ مخدوم شاہ محمود قریشی نے آکھیا اے کہ پی ڈی ایم دے احتجاج،لانگ مارچ دے نال سرکار نہیں جاوے گی۔ایہناں دی 31 جنوری دی ڈیڈ لائن دا وی ایہوی حال ہووے گا جہڑا 31دسمبر دی ڈیڈ لائن دا ہویا۔ منگل دے روز اپنے اک بیان وچ اوہناں نے آکھیا اے کہ وزیر اعظم عمران خان نوں عوام دا اعتماد حاصل اے۔ اوہ پی ڈی ایم دے آکھن اتے کیویں مستعفی ہون گے۔

میں پی ڈی ایم نوں اج آکھ رہیا واں کہ وزیر اعظم عمران خان 31 جنوری نوں مستعفی نہیں ہون گے اوہ 31 جنوری دا انتظار کیوں کردے نیں ایہناں جہڑا فیصلہ کرنا اے ہنی کرلین۔ پی ڈی ایم، کراچی وچ اسرائیل نامنظور ریلی کڈن جارہی اے۔ سوچن دی گل اے کہ ایہناں ایہدی لوڑ کیویں پیش آئی۔دراصل اپوزیشن عوام نوں دھوکہ دے رہی اے۔ اوہناں نے آکھیا اے کہ اسرائیل دے حوالے دے نال ساڈا موقف واضح تے دوٹوک اے۔ ایہدے اتے اسیں کل وی قائم ساں تے اج وی قائم آں۔ہن تے اسرائیل نے وی وضاحت کردتی اے۔چنانچہ اپوزیشن نے سرکار نوں دباؤ وچ لے آن لئی جہڑا بیانیہ تشکیل دتا سی اوہ دم توڑ چکیا اے۔